అక్కడేం కాలక్షేపపు కుటీరాలు నిర్మించబడి లేవు
సప్తస్వరాలు వినిపించే వలపు వాయిద్యాలు లేవు
సేదతీర్చే గాలితెమ్మెర్ల వింజామరలు అస్సలు లేవు
నా భావావేశవీచిక ప్రతిధ్వనుల శంఖారావాలు తప్ప!
అందని పొదరింట అడుగిడాలన్న ఆతృత ఎందుకు?
అంతర్ముఖాలతో అలజళ్ళురేపే అంతఃపురాలు లేవు
తివాచీ పరచి ఆహ్వానించ పచ్చిక పరిసరాలు లేవు
సెలయేటి స్వచ్ఛ జలపాతాల సిరులంతకన్నా లేవు
నాలోనే దాగిన కంటిఊసుల కీచురాళ్ళ అలికిడితప్ప!
అందమైన నూతనోత్సాహ మది అన్న తలపెందుకు?
అంతర్గత ఆందోళనలకి కారణాలు ఇక్కడ వెదక లేవు
ప్రగల్భపు ప్రాకులాట పసిడి పలుకులిక్కడ విన లేవు
విఫలయత్నంతో అంతర్లీన అంతరంగాన్ని చూడ లేవు
నా బలమైన అనుభవసారాల కాలాక్షరసుమాలు తప్ప!
నా ఈ "అంతరంగం" తో 300 పోస్ట్ లు పూర్తిచేసాను.
నేనందించిన భావాలకి ప్రేమాభిమానాలతో స్పందించి నాకు, నా ఆలోచనలకు అక్షర రూపకల్పనాస్ఫూర్తిని ఇచ్చి తప్పుల్ని కూడా సహనానురాగాలతో సరిదిద్దిన ప్రతిఒక్క అస్వాధస్నేహశీలాహృదయానికి శతప్రణామ పద్మాల మాలార్పితాలు.
