కొంతకాలం ఆగు తప్పకుండా ముట్టచెబుతాను
వాగ్దానం చేయలేదన్న వంకతో ఇవ్వననుకోకు
నీకు బహుమతి తిరిగివ్వకుండా ఊపిరి వీడను
కోరరాని కోరికలు కోరే నేనో పంజరంలో ఏకాకీ
కాలాన్ని నీతోటి గడపాలన్న ఆశతో బ్రతికేస్తాను
ప్రేమలోముంచి ఉక్కిరిబిక్కిరి చేసాను శపించకు
నీ ఋణం తీర్చుకోకుండా నేను ఎటూ పోలేను
కోర్కెలతో తడారిన పెదాల్లో ఏముంటుంది చలాకీ
కాలంతోపాటు నేను కలిసి కధలు అల్లుకుంటాను
పనికిరాని వేదాంతం వల్లించి విసిగించా తిట్టుకోకు
నీకు పరిమళమివ్వని పువ్వులేం బహూకరించను
కోరికోరుకున్న బహుమతి నీకందుకే అంత గిరాకీ
కాలానికి ఎదురీది నా తాహతుకుమించిందే ఇస్తాను
ఉబుసిపోక ఊరించేటి ఊకదంపుడు ఊసులనుకోకు
నీకే నిన్నిచ్చి(నీవే నాప్రాణం) బాకీ తీర్చుకుంటాను
