మనకేం తెలీదు..

రేపు అనేది కేవలం మన మనోభావన మాత్రమే

ఒక కల్పనకు రూపమిచ్చి గీసిన ఊహాచిత్రమది
కాలం రేపుని నేడు నేటిని గతంగా మార్చేస్తుంది

అందమైన అబద్ధం ముందు నిజము నిష్టూరమే
ఒక నిజం నిజంగా ఒక్కక్షణం బాధ పెడుతుంది
కానీ  ఒక అబద్ధము జీవితాంతం బాధపెడుతుంది

మనసు మనిషి ప్రేమనేది మనకాల్పనిక భావమే
అవసరానికి అనుగుణంగా ప్రేమ రూపాంతరిస్తుంది
తన మనన్న స్వార్థం ముందది ఓడిపోతుంటుంది

ఎవరమైనా ఒంటరిగా వచ్చి ఒంటరిగా పోవడమే
ఎవరో తోడుంటారనుకోడం మూర్ఖత్వం అవుతుంది
జననమరణాల జాబితా జీవితమే చూసుకుంటుంది

ఒక్కమారు

మల్లెపందిరి క్రింద పట్టుపానుపైతే వెయ్యలేదు
పదిలంగా పరచుకుని పడుకోడానికి చాపుంది
విశ్రాంతి కోసం గుండెనే దిండుచేసే దమ్ముంది
గుండెపై నిశ్చింతగా నిద్రించి చూడు ఓమారు!

పంచభక్ష్య పరమాన్నాలు వండి వడ్డించలేను
ప్రేమగా పచ్చడిమెతుకులే కొసరి తినిపిస్తుంది
సేద తీర్చడానికి చల్లని మజ్జిగిచ్చే స్తోమతుంది
పిలవకున్నా వచ్చి విందు ఆరగించు ఓమారు!

బంధమూ బాధ్యతలంటూ బిగించడం చేతకాదు
నిర్మలంగా ఉన్నదే అడిగి ఇస్తే తీసుకుంటుంది
ఏమి కావాలని అడిగినా చేసే కలేజా నాకుంది
తీసుకునిచ్చే అర్హతుందని నిరూపించు ఓమారు!

విజ్ఞానం నిండున్న వికిపీడియాని నేను కాను
బ్రతకడానికి కావల్సిన జ్ఞానం మాత్రం తెలిసింది
విశ్వమంత అనురాగాన్ని పంచి ఇచ్చే పసుంది
కల్తీ కాని కల్మషంలేని మనసునియ్యి ఓమారు!

నిబ్బరమా నీవెక్కడ!!?

నిర్వేదాన్ని జీర్ణించుకుని సన్యాసినిగా మారిపోయి 

నిర్జీవత్వాన్ని ఒంటినిండా వస్త్రంగా చుట్టేసుకున్నా
మైనంలా కరిగే మనస్తత్వం ఎప్పుడూ మారకుంది!

వ్యక్తం చేయలేని అంతర్గత భావాలు పదాలైపోయి
గంభీరత్వాన్ని ఆవేదనాస్త్రాలతో తూట్లుచేసుకున్నా
బహిరంగం కాని లావా లోలోపల ఉప్పొంగుతుంది! 

నిర్భాగ్యపు ఆశ్రయంలేని ఆశయాలు చెదరిపోయి
వేధించే కోరికలకు మంటపెట్టి బూడిద చేసుకున్నా
ఎద సర్దుకోక ఈసురోమని తననితాను తిట్టుకుంది! 

వలసొచ్చిన అభయాస్తాలు పక్షవాతంతో పడిపోయి
సవ్యంగా ఏంజరగవని తెలిసేలాచేసి ఏమీ చెప్పకున్నా
ఆశ చావని ఊపిరి తనమదిని తానే తడుముతుంది! 

రూపుదిద్దుకున్న శిల్పం నేలకొరిగె ఉలి విరిగిపోయి
క్రిందపడ్డ శిలకు చెదలుపట్టె రాయికి పట్టవనుకున్నా 
నిబ్బరంగా ఉన్న మంచుపర్వతం లోన కరిగిపోతుంది! 

మారిన మనిషి

మనిషి చాలా చిత్రవిచిత్ర మిళిత స్వభావి..
రాయితో శిల్పం చెక్కి ఇసుక సౌధాలే కట్టి
లోహాపు ఆభరణాలు చేసి నిధిగా దాచుకొని
ఆకు అలముల నుండి ఔషధాలు ఎన్నో తీసి
వ్యసనాలను అలవాటు చేసుకుని ఆనందపడి
అద్దంలో తనని తాను చూసుకుని మురుస్తూ
సాటిమనిషి కూడా మనిషని మరుస్తున్నారు!

మనిషి మనిషికేమాత్రం అర్థంకాని వింతజీవి..
తాను మంచవ్వాలని ఎదుటివారిపై నేరం నెట్టి
తన కోరికలు తీరడానికి ఎదుటివాళ్ళను చెడ్డని
సంతోషాపేక్ష వేటలో వేరొకరిని బాధకు గురిచేసి
లేని వాటికై కష్టాలు కోరితెచ్చుకుని హైరానాపడి
తెలిసీ తన పతనానికి తానే పునాదులు తీస్తూ
మనుషులు మరమనుషుల్లా మారుతున్నారు!


తలపు మరపులో..

నిన్ను తలచుకోక పరధ్యానంగా ఉండాలన్న ప్రయాసలో
అసహనంగా అరచేతిలోని మొబైల్లో ఏవేవో నొక్కుతూ..
అప్పుడెప్పుడో పంపిన పాత మెసేజీలను చెరిపేయబోయి
పదేపదే చదువుతూ జవాబు మార్చాల్సింది అనుకుంటా!

అలసిన మనసుకు మెదడుకు సేదకూర్చే ప్రయత్నంలో
అన్యమనస్కంగా అరికాళ్ళు అరిగిపోయేలా తచ్చాడుతూ..
ఎప్పుడెప్పుడో తిరిగిన ప్రదేశాల్ని తలుస్తాను మరువబోయి
చకచకా అన్నింటినీ చూసొచ్చి ఇకపై తలవకూడదనుకుంటా!

భరించలేనట్టి ఎడబాటు అగాధాన్ని పూడ్చివేసే ప్రక్రియలో
అంచెలంచెలుగా ఆలోచిస్తూ దాటే ఉపాయం వెతుకుతూ..
ఇంకెప్పుడూ మనసివ్వనంటా పుచ్చుకున్న మనసివ్వబోయి
మరలమరల మాట్లాడుదువులేని మనసుని మభ్యపెడుతుంటా!

సున్నితపొరే అడ్డుగోడాయె నీకు నాకు మధ్యన్న ప్రలోభంలో
అకస్మాత్తుగా ఏ నిర్ణయానికి రాకూడని సమాధానపడుతూ..
అప్పటికప్పుడు నాతో నేను మాట్లాడేస్తా నీతో మాట్లాడబోయి
మెల్ల మెల్లగా కరిగిన మబ్బులా కురిసి కిలకిలా నవ్వేస్తుంటా!

చివరి ఆశ..

అకస్మాత్తుగా మళ్లీ నువ్వొస్తావన్న ఆశ మిగిలింది
ఇదిగో వస్తానని చెప్పి వెళ్ళిన నీ గుండెలపై గుద్ది
అంతలోనే గట్టిగా కౌగలించుకుని గట్టిగా ఏడ్వాలని
కన్నీటి తుంపర్లలో వలపుల నిధినై తేలాలనుంది!

వస్తే ముక్కలైన గుండెల్లో బాధను చూపాలనుంది
ఎదురుచూపుల ఎడారికి నీ రాక ఒయాసిస్సులద్ది
మూటకట్టిన మూగబాధలను నీకు అప్పగించాలని
ఆ బాధలకు నీ అనుభూతుల్ని జతచేయాలనుంది!
ఒక్కసారిగా ఎదురుబడితే ఏమౌతానో తెలియకుంది
తీర్చక మిగిల్చిన కోర్కెలంటినీ తీర్చుకోవడమే లబ్ది
లేకుంటే మరలా ఏ తలంపొచ్చి జారుకుంటావోనని
గుర్తుండిపోయే గాయాలైనా చేయించుకోవాలనుంది!

నువ్వువేసే శిక్షఏదైనా అనుభవించాలి అనిపిస్తుంది
ఏం కావాలో చెప్పకుండా దోచుకెళ్ళు టన్నులకొద్ది
నాకంటూ మిగుల్చుకోకనే నవ్వులన్నీ నీకివ్వాలని
నీకై కొట్టుకున్న కొనఊపిరిని నీచెంత వీడాలనుంది!

నువ్వు నువ్వుగా..

పరువాలు చూసి పలుకరించే ప్రతీవాడూ
ప్రేమించు ప్రాణమైనా ఇస్తానంటాడే కానీ
ఇవ్వమని అడిగితే ఇంటికైనా రమ్మనడు
పరిచయం చెయ్యంటే నీళ్ళునములుతాడు
ఎవ్వర్లేనప్పుడు సినిమా డైలాగులు చెప్పి
అందరి ముందు ముఖం చాటేసి దాస్తాడు!

ఎదురుగుండా కళ్ళలో కళ్ళెట్టి చూసేవాడూ
మనసు ఇచ్చాను పదిలంగా చూసుకొమ్మనీ
భారమైన మాటలెన్నో చెప్పి మైమరపిస్తాడు
బంధాలు బాధ్యతలూ ఏమీ వద్దని అంటాడు
నిజమో అబద్ధమో అర్థం కాకుండా మాట్లాడి
నిద్రపట్టే రాత్రులన్నీ పగళ్ళుగా మార్చేస్తాడు!

నాకు తప్ప ఇంకెవ్వరికీ అర్థం కానన్నవాడూ
సందర్భం వచ్చినప్పుడు చెప్పకనే జారుకునీ
స్థిరపడ్డాక స్థితప్రజ్ఞత పై ఉపన్యాసమే ఇస్తాడు
పరాయి అయ్యి కూడా సొంతమనిషే అంటాడు
చలించక ఏంకాక తట్టుకుని నిలబడితే జ్ఞానివి
లేదా చిల్లరకు అమ్ముడయ్యావని నిందిస్తాడు!



జరిగీజరగని..

నిముషమైనా నిలువని మది నిను చేరాలని
రెక్కలు కట్టుకుని వచ్చి నీ యెదపై వాలాలని
సందడిచేస్తూ రెక్కల సందేశంగా ఎగిరొచ్చాయి..

వెన్నెల కూడా వెచ్చగుంది నిన్ను ఊహిస్తుంటే
ఎందర్లో ఉన్నా ఏదోగుంది నువ్వు గుర్తొస్తుంటే
చెంపలుపై సిగ్గు దొంతరులు విచ్చుకున్నాయి..

నిదుర ఇక రాదన్న నిజముని మోసుకుంటూ
నాకు నీవు నీకు నేను తోడుగా ఉండాలంటూ
చేతిలోకాలేసి  బాసలెన్నో చేసుకుంటున్నాయి..

జరిగీ జరగని సత్య అసత్యాలను నమ్మీనమ్మక
నా మనసు నీకాడ నీ మనసు నాకాడ ఉండక
అమాయకపు దోబూచాటలు ఆడుతున్నాయి..



స్పందించడం లేదు

చాలా రోజుల తరువాత ఒక ఫోన్ కాల్ చేస్తే
దానికి అటువైపు నుండి సమాధానం రాదు
పలుమార్లు ప్రయత్నించినా స్పందన లేదు!

కొద్దిసేపైన తరువాత ఆత్రుతగా మెసేజ్ చేస్తే
దాన్ని చూసావో లేదో తెలీదు రిప్లై ఏం రాదు
కొంచెం ఆందోళన అనిపించినా చేసేదేం లేదు!

కొన్నిగంటలు గడిపి ఆపై ఎంతగానో ఆలోచిస్తే
మాట్లాడిన మాటలు గుర్తొస్తాయి తను రాదు
ఆముఖం ఆమె అనురాగం తప్ప ఆమె లేదు!

పగటి జ్ఞాపకాల తరువాత రేయిచీకటిని చూస్తే
అసహనం విసుగు చిరాకు అదామెకు తెలీదు
తనతో గడిపిన ప్రతీది గుర్తొస్తుంది తను లేదు!

కలవరపడి కలత చెంది నీ బాధంతా వ్యక్తపరిస్తే
వ్యధతో నిద్రలేని రాత్రులు ఏడ్చినా ఆమె రాదు
ఒక్కసారి తనని చూసి చెప్పాలకున్నా ఏంకాదు!

ఆమె మెసేజెస్ చూసేదేమో ఒకవేళ కళ్ళుతెరిస్తే
చాన్నాళ్ళకి కాల్ చేసావేమోగా వినిపించుకోలేదు
ఆమెతోపాటు మొబైల్ చితిలో పడి కాలిపోలేదు!

ఛీ...బ్రతుకు చెడ!

ఛీ...ఇలా రాస్తే పదాలు ప్రాణం తీసుకుంటాయి
అక్షరాలు సైతం ఆగమని సిగ్గుతో చచ్చిపోతాయి
అంగం ఆకలి మాత్రం ఆడదాన్ని చూస్తే ఆగదు..
మగ అవయవం ఆడతిత్తిని చీల్చి కూడా చావదు!

ఛీ...ఇలా ఎందరి ఆడ ఉచ్చగుంటల్లో ఊరతాయి
మదమెక్కిన పురుషాంగాలు పుండ్లై పుచ్చిపోతాయి
ఏ కులమైతే ఏంది కొవ్వుకామానికి కులం లేదు..
ఒంటిపైపడి నుజ్జుగా కొరుక్కుతిన ఏవాసన రాలేదు!

ఛీ...మీ బ్రతుకులు చెడ తిట్టడానికేం మిగిలాయి
మూకలా పైబడి మానం దోచినాక ప్రాణాలేం చేసాయి
న్యాయం కావాలని నాలుక అరచి ఏం చేయగలదు..
నులిమి జుర్రినాక కాళ్ళే కాదు నడుమూ నిలబడదు!

ఛీ...వట్టలు కోయలేదనే మగబీజాలు స్కలించాయి
అరాచక వీర్యమెగసి వృషణాలు బలిసి బరువెక్కాయి
అగుపడ్డ ఆడదానిపై పడ్డోడు మృగం మగాడు కాదు..
సాక్ష్యాన్ని చంకనాకించే వారిది మనిషి పుట్టుకే కాదు!