వణుకుతూ మూలుగుతూ అటూ ఇటూ పొర్లుతూ..
వచ్చి పోరాదా ప్రియతమాని పలుమార్లు కలవరిస్తూ
అలసి కూర్చున్న నా ఎద ఎగసిపడేలా కుదిపేస్తావు!
చాపక్రింద నీరులా కిమ్మనక కానరాక ఉందామనుకుని
వలపంతా వేడావిర్లుగా చేసి నీ తనువుకు రుద్దుతూ..
దరికి రాకుండా దాకుందామని శతవిధాలా ప్రయత్నిస్తూ
అరమరికలు లేని హృదయాన్ని ఆపలేక అల్లాడతాను!
వయ్యార సౌరభాలు ఎరుగని తిమిరమానస ప్రియురాలిని
ధర్మామీటరునై నీ శరీర ఉష్ణోగ్రతను పరీక్షచేయబోతూ..
పాదరసంలాంటి పరువాలు పదునెక్కి నిన్ను రెచ్చగొట్టిస్తూ
నేను నిగ్రహంగుండి నీ ఒంటి వేడినెలా తగ్గించమంటావు!
పున్నమి పూలను శ్వాస పరిమళాలను మూటగట్టుకుని
మమతల్ని మడతల్లో దాచేసి దాగుడుమూతలాడుతూ..
సరసాన్ని సరైన మోతాదులో రంగరించి మాత్రలుగా వేస్తూ
వెచ్చని దాహాన్ని వేడిపాలతో కాక మురిపాలతో తీరుస్తాను!
