గుర్తుండే ముఖం

సమయానుసారం వయస్సు పెరిగిపోతుంది

కోల్పోయిన కలలలో కట్టివేయబడి నక్కినా

కొంత తెలిసినట్లు మరికొంత తెలియనట్లుగా

శరీరం దూరంవెళ్ళినా ముఖం గుర్తుంటుంది!

ప్రేమని కాంక్షించి ఎన్నో జరగాలని ఊహించి

గుమ్మనంగా కోర్కెలెన్నో కప్పెట్టి కొన్ని తీరినా

కాలం మారి పయనించు నదీ ప్రవాహంలాగా

శరీరం కృంగికృశించినా ముఖం గుర్తుంటుంది!

సంపద మంటల్లో మోము కాలి బూడిదౌతుంది

అమాయకులూ మూర్ఖులూ అమ్ముడుపోయినా

కొనుగోలుదారులు దగాతో నీచానికి దిగజారగా

శరీరం మండి మాడినా ముఖం గుర్తుంటుంది!

బాల్యం యవ్వనం వృద్ధాప్యం తనలోతానే వణికి

అద్దం తననితానే పాతముఖం చూపమనడిగినా

నీరుకారిపోయే నిస్సహాయత సిగ్గుతో తలవంచగా

శరీరము మునిగితేలినా ఆ ముఖం గుర్తుంటుంది!

మనుషులంతా ఒక్కటైనా ముఖాల్లో తేడాఉంది

విభిన్న ముఖకవళికలతో ఎవరెలా మార్పుచెందినా

సిగ్గులేని ముఖాలు జ్ఞాపకాల్లో జీవిస్తాయి నిర్లజ్జగా

శరీరం శవమై కాలిపోయినా ముఖం గుర్తుంటుంది!