చిరిగినబొంత

ఉండమన్నా ఉండక ఊడిపోయేటి ఉట్టుట్టి జీవితంలో..

ఒకరికొకరని బలవంతంగా దూర్చేరు బొత్తాన్ని కాజాలో

బొత్తాం గట్టిగా కుడితే పట్టుకుని ఉండు కాజా బొక్కలో

లేదా విడివిడిగానే ఒకటై చుట్టబడి ఉంటారు బొంతలో!

చీకిచిరిగి ముక్కలైన బొంతకు కుట్లువేసే ప్రయత్నంలో

డాన్సాడే దారం దూర్చేరు నిటారుగా నిలబడ్డ సూదిలో

నాసిరకం బట్టని తెలిసికూడా దాస్తారు పన్నెండుపొరల్లో

అదృష్టాన్ని దిండు చేసుకుని జీవితాన్ని చూడు కలలో!

కరిగేకలలలో బొంత తడవకుండా కప్పాలి టార్పాలిన్‌లో

టేపుతో పొడవైన రాత్రుల్ని కొలుస్తుండాలి అంగుళాలలో

కుడుతూ దారం తెగినప్పుడంతా ఎక్కిస్తున్నాం సూదిలో

అలసినా కూడా అగ్గగ్గలాటే అతుకుల్ని దాచే ఆరాటంలో!

బొంతైనా బనారస్ చీరైనా తేడాలేదు కుట్టే కంటిచూపులో

చేతితో కుట్టినా మిషనైనా దారం దూరవల్సిందే సూదిలో

ఎన్నిగాట్ల కుట్లువేసినా దాగవు ఇవేం జీవితపు చిరుగులో

చిన్నచిన్నగ చిరిగి బొంతతోనే చితికిపోతాయి చివరిదశలో!