అస్థిరం..

నాలుగు గోడల నాణ్యమైన ఏసీ గదిలో

మనసు మెదడూ రెండూ మధిస్తే తెలిసె

కృంగి కృశిస్తుంది నేనూ నా ఆయువని

నిండుజాబిలి తారల నడుమ గగనంలో

నిదురరాని నా కళ్ళు నీరుకారిస్తే తెలిసె

రేయి జోకొట్టుకోవలసింది నాకు నేనేనని

వానా వాయువూ కలిసి చేసె తాకిళ్ళలో

తడిమట్టి సుగంధం నాసికని తాక తెలిసె

మనసెప్పుడూ వయసు ఎరుగని పసిదని

ఓదార్పు ఉపశమన ఉపమాన గానంలో

అంతర్లీన అడుగులు అలజడిచేయ తెలిసె

వలసబాట పయనించే మిణుగురులమని

భావవెల్లువలు ప్రవహించే అనంతములో

వణికిస్తున్న వర్తమానం తడిమితే తెలిసె

చివరికి ఒంటరిగా వచ్చి వెళ్ళిపోవడమని

కలవరపడిన కన్నీటి ఊట ఊరడింపులో

కరిగే కాలాన్ని ఆగిపొమ్మన్నప్పుడు తెలిసె

అనిశ్చల జీవితానికి స్థిరకవచం వ్యర్థమని