ఆరని ఆశలు

ఆశల కొక్కానికి కొన్ని కోర్కెలు వేలాడదీసాను
రాత్రివేళ మంచు కురిసి తుప్పు పట్టింది ఏమో
ఆశలరెక్కలు రాలిపోబోతుంటే చమురును అద్ది
ఊగిసలాడుతున్న ఊహలకు ఊతమిస్తున్నాను!

ఆరని మోహాల మత్తులో మనసుని జోకొట్టాను
తీరనిదాహంతో నిశ్చింతకు నిద్రపట్టలేదో ఏమో
ధీమా ఢీలాపడి వికారంగా వాంతిచేసుకో బుద్ది
గతాన్ని నరికివేసి సంతోషాలని సర్దుతున్నాను!

ఆవేశానికి ఆనకట్టవేసి ఆలోచనల్లో బంధించాను
గాలికి ఎగిరిపడే చంచలధూళి తడిబారెనో ఏమో
మొహమాట మోజుబూజుపై మొట్టికాయలు గుద్ది
కొన్ని జ్ఞాపకాల్ని బొంతలా కుట్టి కప్పుకున్నాను!

ఆలోచిస్తూ ఆకాశంవైపు అదోలా చూస్తుంటాను
ఏం ఆశించి పాక్షికంగా కలగంటున్నానో ఏమో
తప్పని తెలిసి కూడా ఆరి అరిగిన కోర్కెలనే దిద్ది
తలపుల ఎడారిని తడిపే కళ్ళాపి జల్లుతున్నాను!