తృష్ట్ణ...

రాక రాక చాన్నాళ్ళకు నీవొస్తివి

చూడగానే ఆగలేక హత్తుకుంటివి

ఆత్రంగా అదిది అన్నీ అడిగేస్తివి

చూపులతో అక్కడిక్కడ తడిమితివి

పగటిపూట సరసం వద్దురా అనేస్తి!

ఆముదాన్ని ఒంటికంతా పులిమేసి

శెనగపిండితో ఒళ్ళు నలుగుపెట్టేసి

తలని కొబ్బరినూనెతో మర్దనాచేసి

కుంకుడురసం రుద్ది తలంటుపోసి

వేడినీళ్ళ అభ్యంగస్నానమే చేయిస్తి!

ఒంటికి పట్టేసిన మురికంతా వదిలి

నాటుకోడి కూర తీర్చింది నీ ఆకలి

ప్రయాణ బడలికతీరి కుర్చీలో వాలి

సంధ్యవేళ నిన్ను నిద్రపుచ్చె చల్లగాలి

ఆపై లేవగానే వేడిగా తేనీరు నేనిస్తి!

శృంగారం తెలిసిన రసిక రాజువని

పట్టెమంచం పరుపుపై తెల్లదుప్పటిని

దానిపై పూలపరిమళ అత్తర్లు చల్లితిని

ఆవలిస్తూ అంటివి లైట్ ఆర్పేయమని

తీరనిదాహంతో నేను దిండు నలిపేస్తి!