లింకేంటో!

నీకు నాకూ మధ్య ఉన్న లింకు ఏమిటో
నీకేం తెలియదు నాకేమో అంతు చిక్కదు

మతంలేని మమతకి అడ్డంకులు ఎందుకు
అలవికాని ప్రేమకోరుతూ ఆరాటం ఆగదు

ప్రేమించి అనురాగం అడుక్కోడం ఏమిటో
నాలాంటి వెర్రిది నీకు వెతికినా దొరకదు

ప్రత్యేకత కోరుతూ పెనుగులాట ఎందుకో
నాది కాదని తెలిసీ అలమటించ కూడదు

అస్థిరంలో స్థిరత్వాన్ని కోరుకోడం ఏమిటో
నూలుపోగుతో ఏ బంధమూ ముడిపడదు

లేనిరాని హక్కు కోసం పోరాటం ఎందుకో
ఏదేమైనా నువ్వు కావాలన్న ఆశ చావదు

అర్పిత చెప్పే ఈ సూక్తులు ఎవరికై ఏమిటో
చెప్పింది చదవాలే కానీ చరిత్ర అడక్కూడదు