నా సమయం!

రాబోయే ప్రతీ క్షణమూ వచ్చి పారిపోతుంది 

వీలైతే పట్టుకో లేదంటే పొమ్మని వదిలేసెయ్ 

నీ జీవితం కదా నీకు నచ్చినట్లు జీవించు..

లేదంటే ఎలా వచ్చిందో అలాగే వెళ్ళిపోతుంది!

గడచిన క్షణం వెళ్ళిపోతూ సమయంతోటంది 

పారిపోతున్న కాలాన్ని ఎక్కడని వెతుకుతావ్ 

నేను ఏడిపించినా నువ్వు నవ్వి నవ్వించు.. 

కాదంటే కనులుమూసి తెరిచేలోగా వెళతానంది!

రాబోవు కాలం కనుల ఎదుట కలై తిరిగింది

నిన్న నీది కాదు నీ రేపటికై ఎదురుచూసేయ్ 

 మొన్న జరిగింది తలచేం లాభం ఆలోచించు.. 

నీకంటే తోపులు నీతిమంతులులేరు పొమ్మంది!

అయిన గాయాలకి కుట్లేయడమెలాగో వచ్చింది 

జ్ఞాపకాల్లో జీవిస్తూ వ్యధలని నేలకేసి నలిపెయ్ 

మిణుగురుల మెరుపులో నక్షత్రాల్ని లెక్కించు.. 

కుదరకుంటే నీలోకం నీ నీడలా నీతోటేగా ఉంది!

 

నిశ్చలమైన సమయం రేపటి ఆశలో దాగుంది

కాలం విలువ స్పందించే హృదయంతో చెప్పేయ్

ప్రేమను పంచి మేఘంలా నింగిని జయించు.. 

ఇచ్చేదుంటే దోచుకోలేని నిక్షేపం కోరాలనుంది!