తప్పు నాదే..

ఎందరో అపరచితుల గురించి తెలుసుకుని

వారిని చదవడమే సరిపోయిందేమో అతడికి

నేను మాత్రం పరిచయమై కూడా పరాయినై

అతడి లోకంలో చిత్తుపుస్తకమై అమ్ముడయ్యా!

ఎందరినో అడిగి నాగురించెన్నో తెలుసుకుని

నా మనసుని చదివేసి నాకు దగ్గరైన అతడికి

నేను ఉసిగొల్పిన ఆలోచనలేవో అతడి ప్రేరణై

అతడు రాసిన గ్రంధంలో నేనో పంక్తినయ్యా!

ఎందరి మనోభావార్ధాలనో బాగా తెలుసుకుని

వారిమనసు మెప్పించడమే సరిపోయె అతడికి

నేను మాత్రం అంతరంగాలోచనల్లో పదిలమై

అతడి బాధ్యతల్లో బంధాలప్పుడు బరువయ్యా!

ఎవరితోనో నన్నునే పోల్చిచూసి తెలుసుకుని

నా మనోభావాలను చవమని చెప్పా అతడికి

నేను ఇలా అతిగా ప్రేమించేసానేమో చులకనై

అతడి దృష్టికి నేనిప్పుడు ఎంతో అలుసయ్యా! 

తొంగోకే తొమ్మిది..

తొమ్మిది ఒకట్ల తొమ్మిది
నీకే ఇచ్చేసాగా నా మది..
తొమ్మిది రెండ్ల పద్దెనిమిది
నీపై నాకున్న ప్రేమ గట్టిది..
తొమ్మిది మూళ్ళ ఇరవైఏడు
నువ్వే నాకు సరైన జోడు..
తొమ్మిది నాలుగుల ముప్పైఆరు
నువ్వు చూపించు నీ ప్రేమ జోరు..
తొమ్మిది ఐదుల నలభైఐదు
నీ మౌనం నాకు చాలా చేదు..
తొమ్మిది ఆరుల యాభై నాలుగు
నాకు కాకు దూరం ఇక ఆగు..
తొమ్మిది ఏడుల అరవైమూడు
నువ్వే కావాలి నా మొగుడు..
తొమ్మిది ఎనిమిదుల డెబ్బైరెండు
నువ్వు కలకాలం ఉండు తోడు..
తొమ్మిది తొమ్మిదుల ఎనభై ఒకటి
మనసావాచా అవుదాం ఇద్దరం ఒకటి..
తొమ్మిది పదుల తొంభై
నా చివరి శ్వాసకు చెప్పాలి నీవు బై..

జాగ్రత్త..

భావోద్వేగ మేధస్సులేని వ్యక్తులతో బంధమేల!
వారు మిమ్మల్ని ఎప్పుడూ అర్థం చేసుకోలేరు
అన్నీ కూడా వారి తరపు నుంచే ఆలోచిస్తారు
అలా వ్యక్తీకరించే వారితో తస్మాత్ జాగ్రత్త..

స్వీయ అవగాహనలేని వారితో సంబంధమేల!
వారి ప్రవర్తనతో మనం బాధపడ్డా గమనించరు
అన్నీ తామే చేస్తున్నామన్న భ్రమని కల్పిస్తారు
అలాంటి వారి వల్ల గాయపడకుండా జాగ్రత్త..

భావావేశాలను నియంత్రించుకోలేని వ్యక్తులేల!
వారి స్థితి గతుల పైనే మీరు ఆధారపడతారు
అన్నీ కూడా వారికి అనుగుణంగా జరిపిస్తారు
అలాంటి మానసికస్థితి వారితో కాస్త జాగ్రత్త..

తాదాత్మ్యం లేనివారిపై సానుకూలత మనకేల!
వారికి మన భావాలతో పనీలేదు పట్టించుకోరు
అన్నీ వారికనుగుణంగా మల్చుకుని బ్రతికేస్తారు
అదేదో సానుభూతి అనుకోకు జర జాగ్రత్త..

భావోద్వేగమేధస్సుని వారిలో మనం వెతకనేల
ముందుగా స్వీయావగాహన మనం చేసుకుని
భావోద్వేగాలను మనమే నియంత్రించుకుందాం
తాదాత్మ్యంతో మనల్ని మనం మలచుకుందాం!

కారుమబ్బు..

నా వద్ద ఉన్నవన్నీ ఇచ్చాగా

మనువు తనువు ఇంకా ఆత్మ

అలా చేయడం నాకచ్చిరాలేదు

అందుకే ఇప్పుడింకేం చేయను

రేయిలో వెలుగు వెతుక్కున్నా..

నాకు నలుపు అంటే ఇష్టంగా

నా నీడ నీ అత్మల నడుమ

రహస్యంగా ఏదో జరిగుంటుంది

అందుకే నిన్ను ప్రేమించాను

చీకటిని కైవసం చేసుకున్నా..

నా గురించి నీకిక చెప్పనుగా

నిన్ను కావాలని కోరడం భ్రమ

హామీలు బాసలు మూగబోయి

ప్రేమ ఏడారిలో ఒయాసిస్సైనా

రాత్రినే దారెటో చూపమన్నా..

నా ఈ చేష్టలన్నీ తప్పులేగా

నన్ను నేను కోల్పోవడం వ్యధ

తిరిగి ఎదగాలన్నదొక అభిలాష

దాని కోసం దారినే మార్చుకుని

నిశినే నిండుకాంతి కోరుతున్నా..

భావం అదృశ్యం..

భావాలు బాటసారై పయనించగా

కలల బూడిద కాళ్ళకు అంటింది

ఎంతో చెయ్యాలని ఏం చెయ్యలేక

చదివిన చదువేమో చంకనాకింది!

నాగరికత వాడి అస్త్రం సంధించగా

అనాగరికం నగ్నంగా నర్తించింది

అది చూసి జ్ఞానం నవ్వ ఏడ్వలేక

అక్షరం అజ్ఞానంతో అశ్చర్యపడింది!

నిస్వార్ధ నిజం నడుస్తూ నిలకడగా

అబద్దాన్ని ఆత్మహత్య చేసుకోమంది

ఆనందానుభూతులు కలిసుండలేక

విడివడి చెరొక చెంతన చేరుకుంది!

నీచానికి హద్దులు ఆంక్షలు లేవుగా

విప్పుకున్న రెక్కల్తో ఎగిరిపోయింది

దిక్కు తోచని దేహం దిగులు వీడక

కృంగికృశించి చివర్లో అదృశ్యమైంది!

సెక్స్ శీర్షిక

మగాడు మోసం చేయాలని చేస్తాడు
కానీ..ప్రతిఫలంగా మోసాన్ని కోరడు
వాడికి కావల్సిన శారీరక సుఖానికై
ప్రేమనే పంచరంగులను అద్దగలడు!!

ఆడది ఆప్యాయత కోరి మోసగిస్తుంది
తన ఆశల భర్తీ కోసం మోసపోతుంది
ఆమె ప్రేమతో కూడిన శృంగారానికై
బానిసలామారి సర్వం సమర్పిస్తుంది!!

మగాడు తడవతడవకూ మోసగిస్తాడు
ఆడది తలచుకుంటే తెలివిగా చేస్తుంది
ఒకరు సెక్స్ కోసం పోరాడి గెలుస్తారు
మరొకరు ఫీలింగ్స్ కొరకు పడిచస్తారు!!

ప్రేమించే మగాడు మగతనం చూపడు
ఆమె అనురాగం అడక్కుండా ఇస్తుంది
ఇచ్చిపుచ్చుకోడంలో ఇద్దరూ తీసిపోరు
అయినా కామం కళ్ళు మూసేస్తుంది!!

తలగడ మంత్రానికి లొంగని మగాడూ
గర్భం చేసినోడిని వదిలిన ఆడదీ లేదు
మగ-ఆడను శృంగారమేగా నిర్దేశిస్తుంది
తొడ-తొడ బంధం తొంభై ఏళ్ళుంటుంది!!

నాకు నేనే..

నాకేం నాలుగ్గోడల మధ్య నలగాలనిలేదు

స్వచ్ఛమైన అభిప్రాయలమర్చిన సొరుగునై

భావోద్రేకాలు అన్నింటినీ వ్యవస్థీకృతంచేసి

నా జీవితారణ్యానికి నేనే లాంతరునౌతా..

నాకెవరూ సహకరించలేదని కృంగిపోలేదు

గాఢాంధకారంలో నాకు నేనే తోడూనీడనై

సంతోషాలు పంచి దుఃఖాన్ని దిగమ్రింగేసి

నా సొంత మంటలలో నేనే వెలిగిపోతా..

నాకేదో అయ్యిందని పరామర్శ అక్కరలేదు

బాధించేవారి సహేతుక సాకులకి దూరమై

మాట్లాడలేని వారికి మాటలు అప్పగించేసి

నా ఆయుష్షురేఖకు నేనే భరోసా అవుతా..

నాలోని నిస్తేజం నాకలసట కలిగించలేదు

ఎందుకంటే నేను నా శరీరానికి బానిసనై

పరుగులు పెట్టించి నన్నునే పరిపాలించేసి

నా బ్రతుకుకి మంచి అర్థం నేనే చెబుతా..

ఇల్లాలు-ప్రియురాలి

తనకేమో కాలం కలిసొస్తుంది
అది క్రమబద్ధమైన సంబంధం
ఈమెదేమో అక్రమసంబంధం!

తను అధికార బద్దమనిపిస్తుంది
ఆమెది చెక్కు చెదిరిపోని స్థానం
ఈమెదేమో గడియకో నిగూఢం!

తన అవసరాలని లాక్కుంటుంది
ఆమెది అందరి ఆమోద యోగ్యం
ఈమెపైనేమో ఛీత్కార అభియోగం!

తనేమో అడిగి అలిగి సాధిస్తుంది
అది బాధ్యతగా చేయాల్సిన కార్యం
ఈమెదేమో ఎదురుచూసే తరుణం!

తన కడుపున వంశాంకురం ఉంది
అది భార్యగా అమెకున్న అదృష్టం
ఈమె కడుపు కొవ్వు కాలుజారడం!

తనకి అన్నింటా భాగస్వామ్యముంది
ఆమెది హక్కుతో కూడిన యవ్వారం
ఈమెదేమో ఇచ్చి పుచ్చుకునే బేరం!

తాను నలుగురిలో తలెత్తి నడుస్తుంది
ఆమెది గర్వంతో కూడిన నిర్భయం
ఈమె మనసున మూలెక్కడో పదిలం!

తను తిట్టినా కొట్టినా పక్కనుంటుంది
ఆమెతోటి చావుబ్రతుకుల సమ్మోహం
ఈమెతో ఉంటే అది రంకు బాగోతం!

ఇంటా బయటా ఇల్లాలు గెలుస్తుంది
అతడు కాదని అవునన్నా ఇది నిజం
ప్రియురాలు ఎప్పుడూ ఆమడ దూరం!

చిల్లు గాలిపటం

చీపురుపుల్ల త్రుంచి కాగితాన్ని దానిక్కట్టేసి

ప్లాస్టిక్ పతంగీతో పంతమేల గాలిపటమా

చంద్రుడ్ని తాకబోయి చెట్లలో చిక్కుకుంది

అది దాని గొంతెమ్మ కోరికని అనుకోవచ్చు

గాలిపటానికి దారమాధారమని ఎవరికెరుక?

హద్దుమీరిన ఆశయాల్ని ప్రేమతో పెనవేసి

పైకెగిరితే పడిపోతానని తెలిసీ గాలిపటము

ఎవరో పట్టుకుంటారన్న ధీమాతో ఎగసింది

రాలినగాలిపటం రంగులు నచ్చి ఉండొచ్చు

ఉరికొమ్మకు వ్రేలాడుతుందని ఎవరికెరుక?

ఆశల ఆధారాలన్నీ దారంగా ముడులువేసి

పైకెగిరిన మనసు చిల్లుపడిన గాలిపటంలా

క్రిందపడి ఇంకా రెపరెపలాడుతూనే ఉంది

ఎగరేసే వారికది కాలక్షేపం అయ్యుండొచ్చు

ప్రాణాన్ని ఫణంగా పెట్టిందని ఎవరికెరుక?