కరిగిన హారతి

నా తనువునూ మనసునూ నేను కోల్పోయేంతగా

నన్ను నువ్వు అల్లుకుపోయావని నీకు తెలియదుగా

ఒకవేళది నీకు తెలిసుంటే ఇలా చేసి ఉండవుగా..

ప్రతీశబ్ధం కూడా నీ రాకగా వచ్చిన సంకేతమేగా

అది విని ముంగురులు మోముకు ముసుగేసాయిగా

మూసుకున్న తలుపులు బార్లా తెరుచుకున్నాయిగా..

కాటుకద్ది కనులు కంగారులో బసగబారినాయిగా

అద్దుకోబోయిన కుంకుమ చెంపనుతాకి ఎరుపెక్కెగా

నీ దృష్టే తగులును అనుకుని నువ్వు రాలేదేమోగా..

నువ్వు వచ్చావు అనుకుంటే గాలొచ్చి చొరబడెగా

తలలో తురుముకుంటున్న పూలేమో తడబడ్డాయిగా

అరాటంలో అటు ఇటు తచ్చాడి కాలు బెణికెనుగా..

అయిన అలికిడులన్నీ నువ్వు వస్తావన్న ఆశలేగా

నీతో ఉండాలని నిన్ను చూడాలనుకున్న కోరికలేగా

నీ పెదవి పలుకులై కరిగిన కమల కర్పూరం నేనేగా..

మజాచేద్దాం..

మ్యాగీ అయినా మగాడి మూడ్ అయినా రెండు నిముషాలులే

పాస్తా అయినా పిజ్జా అయినా వేడిగా తింటేనే బాగుంటుందిలే

క్యాడ్ బరీ చాక్లెట్ అయినా కన్నెపిల్ల ముద్దైనా తియ్యగుంటదిలే

ప్రైయంస్ అయినా కోమలివేళ్ళైనా పట్టుకుంటే మెత్తగుంటాయిలే

ప్లంకేక్ అయినా పోటుగాడి పట్టైనా పసలేకుంటే పనిజరుగదులే

కర్రీపఫ్ అయినా మగమీసకట్టైనా కరకరమంటే కమ్మగుంటదిలే

బర్గర్ అయినా పిల్లదాని బుగ్గలైనా నొక్కబోతే మెత్తగుంటాయిలే

పేస్ట్రీస్ అయినా ఐస్ క్రీం అయినా కరగక ముందే తినెయ్యాలిలే

నూడిల్స్ అయినా నూడిటీ అన్నా నచ్చినోళ్ళే మెచ్చుకుంటారులే

టోస్టులు అయినా బన్నుముక్కలు తిన్నా బాడీ బలంగుండాలిలే

చిప్స్ అయినా బిస్కెట్లైనా చిన్నదాని చిలిపిచేష్టలకు సరితూగవులే

కుక్కీస్ అయినా కేక్స్ అయినా జతకూడితే ఆకిక్ మజాయేవేరులే

కూల్ డ్రింక్ అయినా సోడా చల్లగున్నా సోగ్గాడు వేడిగుండాలిలే

సాస్&కెచప్ అయినా సరసశృంగారమైనా సాప్ట్ ఐతేనే సంతృప్తిలే

జంగ్ ఫుడ్ అయినా జాలీ చెయ్యాలన్నా శరీరం సహకరించాలిలే

ఆడదానికైనా మగాడికైనా మంచి ఆరోగ్యపు అలవాట్లు అవసరంలే

కొత్త భ్యాష్యం

నిన్ను చూసి స్థంబించిన మ్రానులా నీపై వాలినప్పుడు

బరువనుకుని ప్రక్కకు జరుగకు అది నా అనురాగం!

పెగలని నా పెదాలు నీ పెదాల్ని లేతగా తాకినప్పుడు

గట్టిగా అరచి గోలచేయకు అదేగా వలపు చుంబనం!

నా చేతివేళ్ళు నీ తలను నిమురుతూ చెరిపేస్తున్నప్పుడు

వెర్రని చిరాకుపడకు అదేమో వ్యామోహానికి నిదర్శనం!

నా మోము నీ చేతుల రాపిడికి ఎర్రగా మారినప్పుడు

కనురెప్పల్ని వాల్చ బాధనా అనడక్కు అదే ఆలంబనం!

మనిద్దరి హస్తాలు హత్తుకుని నులుముకుంటున్నప్పుడు

అదేదో పెనుగులాటని వాపోకు అదో వినపడని గేయం!

వెచ్చని శ్వాస ధ్యాసలు రెండూ వివస్త్రలై ఏకమైనప్పుడు

ఉప్పగుంది స్వేదం అనకు అది అంతరోష్ణ ప్రేమద్రవం!

రెండు శరీరాలు పెనవేసుకుని లతలా అల్లుకున్నప్పుడు

ఒకరికొకరము బంధీలైనాం అనుకోకు అదొక బాంధవ్యం!

మారుతున్న లోకం

ఎన్నో భావాలు రంగులు మార్చి పారిపోతుంటే

పొందికతో పదిలపరచాలని ప్రయత్నం చేస్తున్నా

మనస్తత్వ పోకడల్ని అనుగుణంగా మార్చేస్తుంటే

అవగాహననే ఆహారాన్ని జీర్ణించుకోలేక పోతున్నా

ఆశయాలను అలంకరించి అంగట్లో అమ్ముతుంటే

మనస్శాంతి కరువై నష్టవ్యాపారమని వాపోతున్నా

ఎండిపోయి బీడులా బలహీనమై బంధంక్షీణిస్తుంటే

ఆశామ్లధారతో అనురాగాన్ని తడిమి తడుపుతున్నా

రెక్కవిరిగిన పక్షినై కూడా ఎగరలేక ఎగరబోతుంటే

చీకటి వాస్తవాల నడుమ రేచీకటితో తచ్చాడుతున్నా

నా భావభంగిమలు లోకజ్ఞానంలేక చిందులేస్తుంటే

వాటిపై పొగడ్తల వర్షం కురవాలని ఆశపడుతున్నా

మారుతున్న లోకానికి తగినట్లుగా మారాలనుకుంటే

రాజీకి రాని మనసూ మెదడుల మధ్య నలుగుతున్నా

ఛీ పోరా..

వాగేవాడితో వాగ్వివాదం ఎందుకని

వాటేసుకుని వయ్యారాలు బోతిని...

తెగించినోడికి తెడ్డే లింగం అనుకుని

తెలివిగా తప్పించుకుని తలపడితిని

కసురుకునేటోడికి కవ్వింపు ఎందుకని

కనుసైగతో కసిరి కాపురం చేస్తిని...

నవ్వరానోడికి నిక్కులెక్కువ అనుకుని

నపుసంకుడికి రంభ దొరకెననుకుంటిని

అలిగినోడితో ఆటవిడుపు ఎందుకని

అదును కోసం అదేపనిగా చూస్తిని...

చిరాగ్గా ఉంటే చిద్విలాసం అనుకుని

చిర్రుబుర్రులాడితే చిలిపిగా నవ్వితిని

ముట్టుకుంటే మూలగటం ఎందుకని

ముద్దుకి మురిసి గుద్దుకి అరుపేలని...

తిడితే చచ్చి దీవిస్తే బ్రతకరు అనుకుని

తిట్టనంటూ "ఛీ పోరా" గాడిద అంటిని!

తలగడమంత్రం

తెల్లని సుతిమెత్తని మనసువంటి వెన్నపూసిన ఇడ్లీలను

పప్పులపొడితో తినమంటే పల్లీపచ్చడే పసందు అంటావు

దూది బంతుల్లా గుండ్రంగా నా బుగ్గల్లాంటి బొండాలను

బిడియంవీడి బోళాగా పెడితే ఎర్రకారంలో అద్దమంటావు

దొడ్డు బియ్యం రుబ్బి దోరగా ఒకవైపు కాల్చిన దోశలను

వేడిగా ప్లేటులో వడ్డిస్తే కొబ్బరిపచ్చడి ఏదని అడుగుతావు

గుళ్ళు మినప్పప్పుతో నా చక్రాల కళ్ళవంటి చిట్టిగారెలను

ఆడుతూపాడుతూ అందించగా చిల్లు చిన్నది అంటున్నావు

మైదాలేని గోధుమపిండి కలిపి పూర్తిగా పొంగిన పూరీలను

నవ్వుతో అందిస్తేనేమి నంజుకోడానికి కుర్మా కావాలంటావు

సొట్టచెంపల సొగసులద్ది ప్రేమతో వేసిన పెసరపునుగులను

పవిటమెలిపెట్టి ప్లేటులో పెట్టిస్తే చల్లదనానికి పెరుగేదన్నావు

ఆదరువుగా అలిగిన నీకు జీడిపప్పూ నెయ్యివేసిన ఉప్మాను

అందించబోవ ఉప్మా కన్నా ఉపవాసం నయమని అరిచావు

ఆకలి వేస్తే ఏమివ్వాలో తెలియని అమాయకురాలిని నేను

అన్నీ తెలిసిన అగంతకుడివి అసలుకే ఎసరు పెట్టేస్తున్నావు

అందించే అల్పాహారాలు అన్నింటికీ ఏదోక వంకపెట్టే నీవు

అర్ధరాత్రి దీపమార్పి దిండు మంత్రమేస్తే దిమ్మతిరిగిపోతావు

శుభరాత్రి..

అలోచిస్తూ నిద్రపోవాలని ప్రయత్నిస్తున్న నాతో..

ఎలా ఉన్నావూ అంటూ అడిగింది నా హృదయం

చెబితే తెలుసుకోవడంలో గొప్పతనం ఏముంటుంది

మనసుని ఏమార్చే కళ్ళలోకి చూసి కనుక్కోమన్నా!

అసహనంతో అటూఇటూ పొర్లిదొర్లుతున్న నాతో..

ఏం చేస్తున్నావూ అంటూ అడిగింది నా మెదడు

అనవసరమైన ఆలోచనలన్నీ దొలిస్తే ఏముంటుంది

పరిష్కారంలేని ప్రశ్నలేయకని విసుగ్గా కసురుకున్నా!

అనుకోకుండా వచ్చిపడ్డ సమస్య హాస్యమాడె నాతో..

మనిషన్నాక ఇవన్నీ తప్పవని నవ్వాయి పెదవులు

తడుముకుంటే తీరదు ఏదీ తీరిగ్గా యోచించమంది

కనులకు విశ్రాంతి ఇవ్వాలని కలవరం మానుకున్నా!

అకస్మాత్తుగా ఆవలింతలెన్నో వచ్చి అన్నాయి నాతో..

అర్పితా...అలోచిస్తే అసహనమే తప్ప సమస్యలేవీ

పరిష్కరించబడవు అసహనంతో ఎన్నో కోల్పోతావంది

అందుకే నిశ్చింతగా నిదుర పోవాలి అనుకుంటున్నా!

కరిగిపోతూ..

దినదినం నేను తరిగిపోయి కరిపోతున్నా

నీ ఊహకు కూడా అంతు చిక్కనివ్వనులే

నీకు ఆ అవసరం అవకాశం రానివ్వను!

క్షణక్షణం నిన్ను తలుస్తూ ఆవిరైపోతున్నా

నన్ను నే వెలిగించుకుంటూ బ్రతికున్నాలే

అయినా ఆ విషయం నీకు తెలీనివ్వను!

చకచకా నువ్వెళుతూ కప్పిన చీకట్లోఉన్నా

కొవ్వొత్తినై కాలిపోతూ వెలుగుని ఇస్తానులే

కరిగిన మైనం మరకైనా నీక్కనబడనీయను!

టపటపా ఆశల ఆకులు నేలరాలిపోతున్నా

మరో కలకు ఆశావాదమద్ది నిద్రలేపుతాలే

నీకు తెలియని నన్ను నేను మ్రింగేస్తాను!

రెపరెపా రెక్కలు కట్టుకుని ఎగిరెళ్ళిపోతున్నా

ఆకాశపు అంచుల్లో అద్దంలా అగుపిస్తావులే

అలా నిన్ను అంటీముట్టక అంతమైపోతాను!

గతితప్పకు

చిందులేసి చిలిపిగా చూడు పర్వాలేదు

పెనవేసుకోవాలనుకో అదేం తప్పుకాదు

పేట్రేగిపోతే...చీల్చి చెండాడేస్తా చూసుకో

కలలోన కలతగ కంగారుపడితే ఏంకాదు

కావలి కాసి కలవరపెడితే ప్రమాదంలేదు

కావరమెక్కితే...కోసి కారంపెడతా కాసుకో

వ్రాసిన పదాలను చడవడం గొప్పేంకాదు

వలవేసి మౌనాన్ని చదివితే నేరమూకాదు

వలచి మోసగిస్తే...వంచి వాతేస్తా మూసుకో

గాలివాటంగా గతితప్పి గల్లంతైతే గాబరాలేదు

గుంబనంగా చితిరగిలినా బూడిదకాక తప్పదు

గుడిసేటి పనిచేస్తే...గుంతలో పాతేస్తా మానుకో

ఆడదాన్ని అందమైన బొమ్మనుకో హానీకాదు

పెద్దాచిన్నాని చూడక పైనపడితివా ఇదంలేదు

నగ్నంగా నిలదీసి...కాల్చిపారేస్తా చచ్చి పో!!