మగాడి వస్తువే అయినా ఆడదేగా ప్రకటన చేసేది..
బ్లేడు నుండి బనియన్ యాడ్ దాకా అన్నీ మావేగా
ఇక ఎందులో మాకన్నా మీరు గొప్పని విర్రవీగుతారు
మగాడు పుడితే వంశోద్ధారకుడని సంబరం చేసేది..
ఆడపిల్లని తెలిస్తే కడుపులో కడతేర్చేది మమ్మల్నేగా
మాకున్న ఈ సౌకర్యం మీకు లేకున్నా ఫోజుకొడతారు
సమానమంటూ సమాధి చేసే మీవెంట మేమున్నాం!!
మగాడితో పాటుగా స్త్రీలు కూడా ఉద్యోగాలు చేసేది..
మరెన్నో వెసులుబాట్లు సెలవులూ అదనంగా మాకేగా
మరి మగాళ్ళు ఎందుకని అధికులమని అనుకుంటారు
సమానంగా చదివి సొమ్మిచ్చి మొగుడ్ని కొంటున్నాం!!
మగాడు ఆడదీ కలిసేగా కామంతో కాపురం చేసేది..
ఫలితంగా గర్భందాల్చి ఆడైనా మగైనా కనేది మేమేగా
మమ్మల్ని మరచి మగాడి మగతనాన్నే గొప్పనంటారు
సమానం కాదన్న సమాజాన్ని సవాలు చేస్తున్నాం!!
మగాడా అర్ధనగ్న ఆలోచనలు ఆపి విను చెప్పేది..
లైంగికంగా వేధించే నువ్వు అసలు మగాడివే కాదుగా
స్త్రీని గౌరవించి రక్షించు నిన్నో మగమహారాజువంటారు
సమానత్వంగా సాగిపోతూ ఎన్నింటినో సాధించేద్దాం!!
