దూరమై దగ్గర!

కొందరు మనకు దగ్గరగా ఉన్నట్లే ఉండి
జ్ఞాపకాల్లో మాత్రమే సజీవంగా ఉంటారు
మనకి తెలియకుండా మనల్ని నిలదీస్తూ
మన భావాల్లో బ్రతికేస్తూ బ్రతికిస్తుంటారు!

గిరిగీసి రాసుకున్న నిఘంటువులో ఉండి
అదృశ్యహస్తమై వాళ్ళతో తీసుకునిపోతారు
మెదడు మొద్దుబార్చి వారివెంట నడిపిస్తూ
స్వనిర్ణయ అజ్ఞానులుగా మార్చేస్తుంటారు!

పెంపుడు పావురాల్లాంటి పదాలుగా ఉండి
అక్కరకొచ్చినట్లు అక్కడక్కడా వాలిపోతారు
మొండిమనసుని శోఖసాగరం చేసి రోధిస్తూ
పరాకష్టగా పరాయీకరణ దోవన వెళతారు!

అంతరంగోద్భవ చెరసాల్లోనే ఖైదీలుగా ఉండి
చేతకానితనాన్ని చెదలకు ఆత్మార్పణచేస్తారు
నిర్జీవ ప్రాణాన్ని పెకిలించినా నవ్వీ నవ్విస్తూ
జీవించమంటూ ఆత్మహత్యకి ఉసిగొల్పుతారు!