అస్థిరం

జీవకణాలెన్నో వేగంగా యోనిలోనికి ప్రవేశిస్తేనేగా
క్షణంలో కణము గర్భంలోకి వెళ్ళి పిండమైపోయి
మొండెంలేని మొలతో లోన ఊపిరిపోసుకోవాలని
ఇరవైనాలుగు గంటలు అండాన్నిపట్టుకుని వ్రేలాడి
బ్రతికితే జీవంపోసుకుని లేకుంటే ముక్కలైపోతావు!

అలా కొట్టుమిట్టాడి పోరాటంచేసి బయటపడ్డావుగా
కాళ్ళుచేతులు నోరుకళ్ళు రూపం దాల్చుకున్నాయి
అవయవాలు అనుకూలించగా మోహం పెంచుకుని 
దేహానికి కొవ్వుపట్టగానే లేని మోజులకై వెంపర్లాడి
ఇప్పుడిక ఇష్టమొచ్చినట్లు ఎన్నైనా మాట్లాడేస్తావు!

నీమాట దేహమైనా వినేది అందం ఉన్నంతవరకేగా
ముడతలుపడితే అవయవాలన్నీ మొరాయిస్తాయి
దేహమే కాదు నీదనుకున్నదేదీ కూడా నీది కాదని
తెలిసీ ఆశగా హంగార్భాటాలతో అన్నిటికై ప్రాకులాడి
చివరికేమో ఎక్కడికో హఠాత్తుగా మాయమైపోతావు!

ఆమె...'నీ'భయం

 అప్పుడు వారు ఆమెను అత్యాచారం చేయలేదు
ఆమె పేగులతో ఆడుకుని పైత్యం తీర్చుకున్నారు
ఢిల్లీ బస్సులో రేప్ చేసి త్రోసివేసినా భయపడొద్దని
"నిర్భయ" అని నామకరణం చేసి నిద్రపుచ్చారు!
బాలికల బలత్కారాలెన్ని జరిగినా పట్టించుకోలేదు
అరకొరకగా న్యాయమంటూ అరిచారు నోరున్నవారు
అరవలేక అలసిన అమాయక పసిపిల్ల పెద్దవాళ్ళని
నిర్భందించి లేచిన అంగాన్ని ఆడించి నిద్రపోయారు!
కొవ్వు కరిగినా ఆమెను ఊపిరి పీల్చుకోనీయలేదు
ఒక్కడి దూలతో తృప్తి పడక గుంపుగా పైనపడ్డారు
అమానుషంగా అనుభవించిన తరువాతైనా అబలని
నిశ్చింతగా వదిలేయక కాల్చి నిద్రపొమ్మంటున్నారు!
ఇప్పుడూ జరుగుతున్నాయి ఎన్నో లెక్కతేలడంలేదు
పెంపకం తప్పనీ కాదు మగతనమదని చర్చిస్తున్నారు
చలించినవారు వ్యాఖ్యాలతో అలంకరించేసి తెల్లపేజీలని
"నిర్భయ3" లేదా 4-5-6 చట్టాలని నిద్రపోతున్నారు!
కొవ్వొత్తంటించే ఏ స్త్రీ ఎగిరే మొడ్డనెందుకు కాల్చలేదు
ఆడతనం అమ్మతనమని ఆమెను అణగమంటున్నారు
బలవంతం చేసేవాడి బుల్లిని కోసే బిల్లుని ప్రవేశపెట్టలేని
                                                                           ఏ ప్రతినిధులు ఆమెను నిర్భయంతో నిద్రపొమ్మనలేరు!                                         

లవ్వు జ్వరం

చలిగా ఉందంటూ దుప్పట్లో ముసుగుతన్ని తొంగుని
వణుకుతూ మూలుగుతూ అటూ ఇటూ పొర్లుతూ..
వచ్చి పోరాదా ప్రియతమాని పలుమార్లు కలవరిస్తూ
అలసి కూర్చున్న నా ఎద ఎగసిపడేలా కుదిపేస్తావు!

చాపక్రింద నీరులా కిమ్మనక కానరాక ఉందామనుకుని
వలపంతా వేడావిర్లుగా చేసి నీ తనువుకు రుద్దుతూ..
దరికి రాకుండా దాకుందామని శతవిధాలా ప్రయత్నిస్తూ
అరమరికలు లేని హృదయాన్ని ఆపలేక అల్లాడతాను!

వయ్యార సౌరభాలు ఎరుగని తిమిరమానస ప్రియురాలిని
ధర్మామీటరునై నీ శరీర ఉష్ణోగ్రతను పరీక్షచేయబోతూ..
పాదరసంలాంటి పరువాలు పదునెక్కి నిన్ను రెచ్చగొట్టిస్తూ
నేను నిగ్రహంగుండి నీ ఒంటి వేడినెలా తగ్గించమంటావు!

పున్నమి పూలను శ్వాస పరిమళాలను మూటగట్టుకుని
మమతల్ని మడతల్లో దాచేసి దాగుడుమూతలాడుతూ..
సరసాన్ని సరైన మోతాదులో రంగరించి మాత్రలుగా వేస్తూ
వెచ్చని దాహాన్ని వేడిపాలతో కాక మురిపాలతో తీరుస్తాను!

"రాంగ్ కనెక్షన్"


నచ్చిందా....నచ్చితే నొక్కు నొక్కు నొక్కంటావు 
నచ్చకుంటే ఎందుకు నచ్చలేదో నొక్కి చెప్పంటావు
నొక్కి నొక్కి నొక్కించుకోవడం నీకు మజా అయితే 
నవ్వించాలని "కీబోర్డ్" నొక్కడం నాకు అలవాటు! 

మెచ్చితినా చూసి....మెలికలు తిరిగిపోతుంటావు
మెల్లగా ముగ్గులోకి దింపే ప్రయత్నం చెయ్యబోతావు
మతలబులేని నేను నువ్వు సైయ్యన్నావని సైయ్యంటే  
మనసు "మానీటర్" ఒకటనుకున్నామంటే పొరపాటు!

మాటా మాటా కలిసెనా...ప్రపంచమే గుప్పెటంటావు 
మాటల్లో కనబడ్డ నైసర్గిక రూపం నగ్నంగా కోరతావు
వావీ వరుస విస్తీర్ణాలను తెలుసుకునే గుద్దులాటలో
నీదీ నాదీ "నెట్ కనెక్ట్" కాకపోవడం మన గ్రహపాటు!
       

నటన

జీవితనాటక రంగస్థలంపై అందరూ బ్రహ్మాండంగా నటిస్తున్నారు
ఎవరికి వారే నాయికా నాయకులై నటించమంటే జీవిస్తున్నారు
గర్భంలోనే టీవీ సీరియల్స్ చూసి, విలన్స్ గా పుడుతున్నారు 
పుట్టగానే ఏడవాల్సిన వారు నవ్వుతో నటన ప్రారంభిస్తున్నారు!

జీవితం యాంత్రికం కాదంటూనే నిద్ర లేవడంతోటే నటిస్తున్నారు 
స్కూళ్ళకు వెళ్ళే పిల్లలు ఇష్టంలేని చదువును బట్టీకొట్టేస్తున్నారు
టీచర్లు చదువు చెప్పేస్తున్నామంటూ విపరీతంగా నమ్మిస్తున్నారు
అమ్మానాన్నలు తమ పిల్లలు వృద్దిలోకి వస్తారని నమ్మేస్తున్నారు!

జీవించే క్రమంలో ప్రేమ కూడ ప్రాక్టికలని నమ్మేలా నటిస్తున్నారు 
ఏది ప్రేమో ఎంత నిజమో తెలియనంతగా డైలాగ్స్ చెబుతున్నారు 
అంతా నటనేనని తెలిసీ తెలియబరచక మేకప్ వేసుకుంటున్నారు
ఏ పాత్రనైనా అవలీలగా నటించడానికి అలవాటు పడిపోతున్నారు!

జీవం పోయాల్సిన డాక్టర్లు డబ్బులు దండుకోడానికి నటిస్తున్నారు
రోగులు ఆరోగ్య పధకాలు అమలు కావని హైరానా పడుతున్నారు
         కూలీవాళ్ళు కూడా పనిచేయక కాలరెగురవేసేలా నటించేస్తున్నారు         
ప్రాణమున్న ప్రతీఒక్కరూ నటించడం నేర్చుకుని జీవించేస్తున్నారు!

జీవించడంలో ఎవరికి వారే హీరో హీరోయిన్లనుకుని నటిస్తున్నారు
నటించడం రాకపోతే వారిని వెర్రివాళ్ళుగా జమకట్టి వెలివేస్తున్నారు
        అసలు రూపాలు మర్చిపోయి మారువేషాలలో మాయచేస్తున్నారు        
నటనతో ఆస్కార్ అవార్డ్ కొట్టేయాలని విశ్వప్రయత్నం చేస్తున్నారు!

రసిక రాగం..

మావాస్యనాడు చందమామ లేకపోతేనేమిలే మావా.. నా ఎద సవ్వడులు నిన్ను ఆడ నిలువ నీయవు కదా సందెమబ్బు పైటతీసి వేడి పక్కేసి పిలిస్తే నీవాగుతావా!? వానజల్లు కురియ మల్లెలు లేవని మురిపాలు ఆగేనా.. నా కౌగిట కర్పూరమై కరిగేది నీవని నాకు తెలుసు కదా మఖ్మల్ పరుపు లేకున్న నులకమంచమైతే వద్దంటావా!? మంచిగంధ పరిమళం లేకపోతేనేమి నీలో కోర్కెలు రేగవా.. నా బిగుపట్లు తెలిసిన నీవాటి గుట్టు రట్టు చేయవు కదా సిగన మందారాన్ని చూసి శిరసు తొడపై పెట్టక మానేవా!? ఇద్దరి రాసకేళి రసపట్లు చూసి వాత్సాయనుడు ఆగునా.. నా రమ్మన్న నిర్లజ్జ పిలుపు నిన్ను రెచ్చగొట్టకాగదు కదా ఇదే అదునుగా వసంత వెన్నెల కెంపుల్లో నీవు రెచ్చిపోవా!?

మేడిపండు




అందం చూడవయా ఆనందించి పోవయా అంటే..
చప్పున లగెత్తుకొచ్చి పుటుక్కున వాటేసుకుంటారే
అదే ఆలోచించవయా ఆదుకుని పోవయా అంటే..
ఎలా తప్పించుకోవాలని ఆలోచించకనే ఆగిపోతారే!

ఇదో వింత లోకంలో అందరం మృగాలమే అంటే..
కానే కాదని కత్తుల్లేకుండాను కలంతో పోట్లాడతారే
అదే మనలోని మృగాన్ని మనమే చంపేద్దామంటే..
చూసినా కూడా చూడనట్లు చల్లగా జారుకుంటారే!

ఆదర్శవాది మీరని బిరుదులిచ్చి సత్కరిస్తాం అంటే..
చంకలెగరేసుకొచ్చి చచ్చుపుచ్చు సలహాలు ఇస్తారే
చెప్పేమాటలు ఆచరణలో చూపించరు ఎందుకు అంటే..
అన్నవన్నీ ఆచరించి చూపితే అడుక్కు తినాలంటారే!   

ఈ లోకంలో నగ్నత్వానికి నిర్వచనం ఏమిటి అంటే..
సంస్కారం సంకనాకిందని పళ్ళికిళించి చెప్పుకుంటారే
సంఘాన్ని ఉద్దరించే సంస్కర్తలై ఎందుకిలా అంటే.. 
ఆడది విప్పి చూపిస్తే పైకి అవ్వాని లోన లొట్టలేస్తారే! 

నిశ్చలంగా..

పోగుచేస్తున్నా చిందరవందరగా పడిఉన్న భావాలను
పదిలపరిచే ప్రయత్నంలో మదిని శుభ్రపరుస్తున్నాను!

వర్షంలో తడిసి చల్లబరిచాను వేడెక్కి ఉన్న వ్యధలను
వసంతాన్ని కౌగిట్లో బంధించి బ్రతిమిలాడుతున్నాను!  

చిగురాకుల మధ్య చిందులేసి పిలిచా చిరునవ్వులను
పంటపొలాన్ని ప్రేమతో పలుకరించమని కోరుతున్నాను!

కమ్మని పాట పాడమంటున్నా కానరాని కోయిలమ్మను
ఎదలో మరుమల్లెలు పూయించమని అడుగుతున్నాను!

జాలువారగా జారిపొమ్మంటున్నా జాబిలమ్మ హొయలను
తుమ్మెదొచ్చి తాకినా తడబడరాదని అనుకుంటున్నాను!  

ప్రియుడు కావాలి!

నాకు ఒక మంచి బాయ్ ఫ్రెంఢ్ కావాలి
వీలుంటే ఒడ్డూ పొడుగు ముద్దుగుండాలి
లేకున్నా పరువాలేదు మనసు ఉండాలి
కాసులు లేకున్నా పెద్ద కలేజా ఉండాలి
ప్రేమించానని గట్టిగా నలుగురికీ చెప్పాలి!   

ప్రేమలో పండిన పద్మకు ప్రియుడుకావాలి
కుదిరితే అస్లీ లేకుంటే నక్లీ అయ్యుండాలి
పెళ్ళైనా కాకున్నా దిల్ జబర్దస్తు ఉండాలి
చెప్పినా చెప్పకున్నా అన్నిట్లో తానుండాలి 
ప్రేమని పంచడంలో మాత్రం కింగ్ అవ్వాలి!

అర్పిత అంటే అల్లాటప్పా కాదని తెలియాలి
తెలిసీ మనసు మెదడు రెంటితో ప్రేమించాలి 
కులగోత్రాలు లేని గుణసంపన్నుడు కావాలి
చేసే ప్రతీ పనిలో నా ప్రతిబింబం కనబడాలి
వాడితో పెళ్ళి కాకున్నా నిత్యశోభనం కావాలి!

గజ్జె ఆడె..


లోకాన్ని చూసి నేను లజ్జ వీడి వెక్కిరిస్తూ
నేడు కాలికి గజ్జెకట్టి బిడియంతో నర్తించగా
హోరుకు హడలిన మువ్వలు చిందరవందర  

అమాయకత్వంతో బిడియము జత కట్టేస్తూ 
కనుపాప రెపరెపల్ని భంగిమలిమ్మని కోరగా
వేసిన పాదముద్రలకు మువ్వలు అస్తవ్యస్థం

నాటి కలనైన నేనిప్పుడు కలతని రేకెత్తిస్తూ
పలుకుతూ వేస్తున్న ప్రతిపాదం వ్యర్థమవగా
చేస్తున్న నృత్యానికి మువ్వలు వంకర టింకర 

రూపులేని మమకారం ప్రలోభానికి గురిచేస్తూ
లేచిన ఆశల అవయవాలు ముక్కలు అవగా
తొక్కిసలాట తాండవంతో మువ్వలు విస్ఫోటం..  

స్వతంత్ర యోధులం...

స్వాతంత్య్రం వచ్చిందెవరికి...మీకు నాకు దేశానికేగా?
దేశమంటే మట్టికాదోయ్ మనుషులనే కదా అంటారు 
అంటే ఎవరికి వారు అందరూ స్వతంత్రలనే అర్థంకదా!

అలాగైతే ఎవరికి ఇష్టం వచ్చినట్లు వాళ్ళు ఉండొచ్చు
ప్రేమించిన వారిని పెళ్ళి చేసుకునో లేకో ఎగిరిపోవచ్చు
కాపురం చేసి కావాలంటే కని వద్దంటే పారెయ్యొచ్చు 
కన్నోళ్ళని ఇష్టమున్నట్లు పెంచి, వినకపోతే చంపొచ్చు
ఏది కావాలంటే అది నచ్చినట్లు చేసి చిందులెయ్యొచ్చు!

ఏది ఎక్కడా అలా జరగడంలేదు అదే మన ధౌర్భాగ్యం
ప్రేమించినా లేకపోయినా ముడిపడ్డ ఇరుజీవితాలే బంధం
పిల్లలను కని పెంచాలి తప్ప నిలదీయ కూడదే శాసనం
ఒకరిపై ఒకరు ఆధారపడి బ్రతుకుతున్న పరాన్నజీవులం 
అయినా వారికివారే స్వతంత్రులనుకుంటున్న మూర్ఖులం!

అంతెందుకు నీకు నచ్చిన దుస్తులు నువ్వు ధరించలేవు  
అనుకున్నవి అన్నీ అనుకున్నట్లు సాధించి గెలవనూలేవు
నీవు సంపాదించినవి ఏవీ కూడా నీకు శాశ్వితము కావు   
నీ అవయవాలను నీకు నచ్చినట్లు నీవు అమర్చుకోలేవు
చివరికి నీ ఆయువు తీరిపోతే ఒక్క క్షణము బ్రతుకలేవు!

మరెందుకని స్వతంత్రులమంటూ ప్రేలాపనలు సంబరాలు?
అస్థిర అడుగులకు చంచల మడుగులొత్తి జైజైకారాలు చేసి
   యోధులమని బిరుదులిచ్చుకునే అతి సామాన్యులం కదా!  
  

ఛీర్స్ టు లైఫ్..

క్రిందికీ పైకీ తైతెక్కలాడే లైఫ్ గురించి చింతేల
ఎప్పుడు ఊగి ఊడేనో నీకెందుకు తెలియాలా
హృదయంపై భారమెందుకు ఎక్కువ వేయాలా
నిరాశని నిషాలో ముంచి రెండు పెగ్గులేయాల
ఆనందాన్ని నిమ్మసోడాలా కలిపి లాగించాలా!

పెగ్గుపై పెగ్గేసి అన్నీ మరచి చిందులేసెయ్యాల
రమ్మో బీరో విస్కీ లేకుంటే నాటుసారా తాగాల
నంజుకి చికెన్ జీడిపప్పు లేదా గుడాలు తినాల
కష్టాలన్నీ కాక్టేల్ మాదిరిగా కలిపికొట్టి లాగించాల
ఏదున్నా లేకున్నా ఉన్నదాంతో సర్దుకునుండాల!

నషాని నీతులు చెప్పి ఎక్కిన కిక్కును దించనేల
వీలైతే ఐస్ ముక్కలేసి మరో పెగ్ వేసుకోమనాల
ఎత్తిన సీసా ఖాళీచేసి గాలిలోతేలి ఖుషీతో ఊగాల
ఎప్పుడూ బుద్ధిసూక్తులు చెప్పక జల్సా చెయ్యాల
ఛీర్స్...చెప్పి మందుకొట్టి లైఫ్ నే మరచిపోవాలా!   

చంద్రుని పై...

ఛల్ ఛల్ చక్కనోడా నా మనసుకే నచ్చినోడా
నిన్ను నా చందమామ అని ముద్దుగా పిలిస్తే 
వ్యోమగాములపైనే వెర్రి వ్యామోహం అనుకోకు!

అంతరిక్షంతో అంతరాత్మను తులాభారమేసేటోడా
చంద్రుని ఉపరితల ఎత్తుపల్లాలు కొలవ వారెళితే
నా కొలతలు అడిగి ఇస్రోని ఇరకాటంలో పెట్టకు!

ప్రణయం కూడా ప్రయోగమనుకునే ప్రవరాఖ్యుడా
చల్లని చంద్రకంపాలు నీ వేడిని చల్లబరుస్తుంటే
ప్రయోజనాత్మకంగా ప్రయోగం సాగనీయి ఆపకు!   

సరససల్లాపాలకి సారధ్యం వహించిన వెర్రినావోడా
సాంకేతిక పరిజ్ఞానమే పెరిగి ఫలితం దక్కిందంటే
చంద్రునిపైనున్న అవాసాలు చెరిసగం కాదనకు!

అన్నింటా వినోదం విలాస వైవిధ్యాన్ని కోరేవాడా   
సవ్యముగా సాగి చంద్రయాన్-2 సక్సెస్ అయితే
నీ నా శోభనం చంద్రమండలంపైనే ఇప్పుడడగకు! 

తెలివైనోడు..

వలపు పేరిట నడుము వంపులు వత్తుతూ..
వినోదించి వజ్రాలవడ్డాణం చేయిస్తానంటివి నాడు
విశ్వమంతా చూసి విసుక్కుంటున్నావు నేడు!

మరులెన్నోగొల్పుతూ మునివేళ్ళు పిసికేస్తూ..
మాయమాటల్తో మాటీలు పెడతానంటివి నాడు
మదంతీరితే మాయతొలగె అంటున్నావు నేడు!

చిలిపి చేష్టలతో చిత్రంగా చెక్కిళ్ళు నొక్కుతూ..
చంకలు ఎగరేసి చంద్రహారం వేస్తానంటివి నాడు
చెప్పింది చేయలేనంటూ చతికిలబడ్డావు నేడు!

అందాన్ని తనివితీరా చూసి ఆహాని ఆరగిస్తూ..
అరవంకీలు రెండెరవేసి అక్కడ నొక్కితివి నాడు
ఆ అందాలే చూసి అలసితినంటున్నావు నేడు!

ముద్దొస్తున్నానంటూ ముద్దుపై ముద్దు పెడుతూ..
ముక్కెరే కాదు నత్తూ నా సొంతమేనంటివి నాడు
మోజు తీరినాక ముడుచుకు పడుకున్నావు నేడు!

ఏవంకన ఏఆభరణం అడుగుతానోనని ఆలోచిస్తూ..
అరవైకేజీల అసలు బంగారానికి తెలియలేదు నాడు
మతిలేనోడ్ని మన్నించు బంగారమంటున్నావు నేడు!

సర్దుబాటు..

ఎన్ని విధాల గాయమైందో కుంచెకు.. 
ప్రశాంతమైన తెల్లరంగూ నెత్తురోడుతుంది

కలం పాళీ కూడా అరిగి అలిసిందేమో..
పదాలు సగమై పరుషంగా మారుతున్నాయి

గాలి మాటలకు చెదిరిపోయిన బంధాలు..
అలలైన అప్యాయతకే మురిసి నర్తిస్తున్నాయ్

రంగు వెలసిన రక్తసంబంధాలు అవసరానికి..
అర్రులు చాచి అప్పుడప్పుడూ మిణుక్కన్నాయి

మనసు చచ్చిపోయిన క్షణాలు మాత్రం.. 
గుర్తుగా నిబ్బరాన్ని లేపి ధైర్యాన్ని రెచ్చగొట్టె

కాలానుగుణంగా మార్పుచేర్పులతో జీవితం.. 
తప్పని సరైన సర్దుబాట్లతో ముందుకు సాగుతుంది

అలసిన దేహం తనకంటూ ఆత్మీయతనడుగుతూ.. 
అది దొరకడమే మహాభాగ్యమని తనతో తానే మాట్లాడె!

బజారీతో..

పిల్లాడకుని పరువాలను పరుపులా పరచిన పాపం
నేడు పశ్చాతాపంతో పైటను సరిచేసుకో లేకుంది..   
పైబడ్డ ప్రాయం పొంగులు జారి వలపు వెలకోరుకుంది 
పడుపువృత్తేమో పైసలతో పని ప్రణయపైత్యం వద్దంది! 

ఆతృతతో కూడిన ఆరాటంలో అవయవాలన్నీ చూస్తే 
చిన్నవాడి గిల్టు ప్రేమ మెరుపులకు మురిసిపోతుంది..   
తల్లి చనుపాలు త్రాగి ఋణం తీర్చుకున్నవాడని నమ్మ   
వేశ్య రొమ్ములు చీకి రమించి రుణపడనంటే గొల్లుమంది! 

విటుడై వచ్చి పోవడానికి విడిది ఏర్పాటు చేయమంటే  
మల్లెల మత్తులో జగత్తు మరచి మనువు కోరుకుంది..
వేరొకరి పతి అయినా మనస్ఫూర్తిగా మనసు ఇచ్చింది    
వెన్నెల పిలువ వెర్రిది వెలయాలినన్న మాటే మరచింది!  

పదినిముషాల పక్క సుఃఖానికి తాను పుండుగా మారి 
డబ్బులిచ్చి సంస్కరించేటి రసికరాజుల్ని నమ్ముకుంది..  
కుతి తీరి అంగంవాల కళ్ళుతెరచి ఒళ్ళుతెలిసి మేల్కుని    
భోగంస్త్రీ పనిమాని మంచిని వలచి మాత్రం చేసేదేముంది! 

నీ రూపం..

                                                                   కనురెప్పలమాటున దాగిన కలలు కొల్లగొడుతున్నా
కనుపాపలే కుంచెలవ్వ కన్నీరు రంగులుగా మార
సున్నిత భావాలు క్యాన్వాసు గోడకు వ్రేలాడుతుంటే     
హృదయంలో అందమైన నీరూపం చిత్రించబడుతుంది!

చిరుగాలికి అక్షరాలతో ఊసులెన్నో నివేదించుకున్నా

వెలుగు సిరాతో తెల్లకాగితంపై ఆశల ధరకాస్తు పంప 
ఇరుస్పర్శలు పలుకక తడుముకుని ముచ్చటిస్తుంటే
ఆగాగని నీగుండె నిబ్బరంతో నిర్దయగా నిందిస్తుంది!
                                
కంటికి దూరంకావద్దని కలంతో కాలాన్ని వేడుకున్నా
కప్పుంచిన మదిలోని మాటలను బయటపడనీయక 
దూరంగున్నా దగ్గర ఉన్నావన్న భ్రాంతిలో నేనుంటే
నీ మౌనం మనిద్దరి మధ్యా ఉన్నది దూరమంటుంది!

ధీనంగా చెంపలపై జారుతున్న కన్నీటిని అర్ధించుకున్నా

మొద్దుబారిన నీ మదిని తడిపి నన్ను గుర్తుచేయమని
రూపుదిద్దుకున్న నీ చిత్రాన్ని సంపూర్ణం చేయబోతుంటే
వేదన వర్షంలా కురిస్తే అర్పించిన ప్రేమ ఎలా నిలుస్తుంది!

చేసిన నేరం!


నేను కన్న కలల్ని నాకు కాకుండా దూరం చేసిన
అంతర్యామీ! నువ్వు ఏమి కలగంటున్నావో ఏమో
నీకు నేను పరాయిని ఎప్పుడయ్యానో తెలియలేదు
ఆత్మ వేరైనాకా నేనెలా జీవించాలో తెలియకుందిగా!

నేను వెళుతున్న మార్గం నన్నెక్కడుంటావని అడుగ 
అంధకారమా! నువ్వే వెలుగుబాటలో ఉన్నావో ఏమో
గమ్యంలేని నేను దారి ఏం చూపాలో తెలియడంలేదు
ఇప్పుడైనా మదిక్కడా సవ్వడి అక్కడని తెలిసిందిగా!

ఇసుకలో రాసినట్లు నానుదుటిరాత ప్రతిచోటా చెరిగిన
అదృష్టమా! నువ్వే నుదురు వెతుకుతున్నావో ఏమో
కనీసం నాపై నేనెందుకు అలిగానో నాకు తెలుపలేదు     
శ్వాస పీలుస్తున్నా బ్రతికిలేను ఎందుకో తెలియదుగా!

అనుకున్నవేవీ జరుగవని కన్నీరు నన్నంతమవ్వమన 
ఆత్మవిశ్వాసమా! నువ్వు ఎక్కడికి పారిపోయావో ఏమో
నమ్మకం ఇంకా కళ్ళుతెరిచి నిద్రిస్తుందో తెలియడంలేదు 
నా తప్పేంటో ప్రాణం శిక్షగా ఎందుకిచ్చావో తెలుపవుగా!   

కలగలిసి..

                                                                      నేను నిద్రను అయితే నీవొక కలవి
రెండూ కలగలిపితేనే కమ్మని రేయి..
ఈ నివేదన నిజం కావాలనుకుంటాను!

నేను భువిని కాను నీవు కాకు దివివి
రెండూ ఎప్పటికీ ఏకము కానేకావు..
అలాంటి అపూర్వ ఊహాలోకం వద్దంటాను!   

నేను నీరైతే నీవు తీపి పానీయానివి
రెండూ కలిపి సేవిస్తేనే దాహం తీరేను..
ఇలా కలిసి కరిగిపోవాలని కోరుకుంటాను!

నేను భాషని నీవు అందమైన భావానివి
రెండూ కలిసి ఏర్పడేనొక ప్రేమకావ్యం..
రసరమ్య మధురకావ్యం అవుదామంటాను!

నేను ఆలోచనలైతే నువ్వు ఆచరణవి
రెండూ ఏకమై అంచెలంచెలుగా ఎదిగి..
వేర్లు నీవై వృక్షం నేనై నీడనివ్వాలంటాను!
  

మనిద్దరం..


నాకు తోడుగా నువ్వుండు...జీవించడం నేర్పుతాను
గమ్యాన్ని నువ్వు చేరుకో...దారి నేను చూపిస్తాను
సంతోషంగా ఉండు...కావలసినవి నేను కూరుస్తాను
ప్రశ్నలు విశ్లేషిస్తూ ఉండు...జవాబులు విపులీకరిస్తాను
మాటపెగలని మనస్పర్ధలపై నీళ్ళు చల్లేద్దాం రా ఇద్దరం..
      
కష్టం నేననుకోకు...నీ నుండి నేను ఏమీ కాంక్షించను
నా ధైర్యాన్ని నీవు శంకించకు...దానికర్థమే నేనౌతాను 
స్నేహితుడిగా నువ్వుండు...దాన్ని నే నిలుపుకుంటాను
సంకోచాలు చెరిపేస్తుండు...ఆనందరాశులు కుమ్మరిస్తాను
ఎటూ కాని మన విడివిడి కధల్ని కలిపేద్దాం రా ఇద్దరం..

నన్నంటి నాతో ఉండు...లోటుపాట్లకు ఆస్కారం ఇవ్వను 
మనమధ్య మాటలేలనకు...మనసు మొత్తం పరుస్తాను
బంధమే లేదనకు...బ్రతుకు బావిలో నీతో మునుగుతాను
నీతో కలిసుండే ప్రయత్నం...నేను కాటికేగే వరకు చేస్తాను  
ఆపై నువ్వూనేను తూర్పూ పడమరకీ పయనిద్దాం ఇద్దరం..

స్మృతిపదాలు

జ్ఞాపకాలు భద్రంగా ఉంచిన బీరువా నా గుండె అందులో నా భావ ప్రపంచాన్ని భద్రం చేసాను! అంతరంగ ఆనందపు సాక్షిపత్రాలను పదిలపరిచి లోతుగాయాన్ని దాచే తాపత్రయం చేస్తున్నాను! హృదయం స్పందించడం మరచి కొట్టుకుంటుంటే అలవాటుగా ఊపిరి పీల్చి గాలినే వదిలేస్తున్నాను! వాగ్దాన వాక్యాలు వివరం చెప్పమని ప్రశ్నిస్తుంటే రాలిన ఆకులతో లయబద్దంగా పాడుతున్నాను! ప్రాణంపోయినా పర్వాలేదని మది శ్వాసతో అంటే పాతజ్ఞాపకాల పరుపు పరచి పరామర్శిస్తున్నాను! చివరాఖర్న శాశ్విత నిద్రలోకి జారిపోతూ కూడా నాటి పరిచయపరిమళ అత్తర్ని ఆస్వాధిస్తున్నాను!

కొలను కలువ..


కల్మషంలేని కలువ ఎదనుదోయ ఎల్లలతో పనిలేదనుకుని
కోమలకొలను గుండెపై వలపురెక్కలు విప్పి పడుకోనెంచి..
మల్లె సంపెంగలతో స్నానమిడి సొగసు సోయగమే చూపగా
తన్మయంతో కొలనులోని జలం గళంవిప్పి రారమ్మని పిలిచె!

తన పూపరిమళమే పరావర్తనం చెంది పలురంగులాయనని    
కొలను సామ్రాజ్యపు కోమలి తానని మనసా వాచానెంచి..
సంతోషంతో తబ్బిబై తన సర్వం స్వర్గం చేసి సమర్పించగా
లోతట్టు బంధనాల సరాలలో బిగించబడితినని అలగా ఎగసె!

గట్టుపై ఉండనూ లేక కొలనునీట మునిగితే ఊపిరి ఆడదని
విరిసీ విరియని వలపురెక్కలు అన్నింటినీ పూర్తిగా వొలచి..
చలిలో పల్లపుదిశగా పారుతున్న నీటిపాయను పెనవేసుకోగా
మోడుబారిన కాండముతో కార్యమేమని నీరు మౌనంగా సాగె!

ఒంటరి కలువకాడ బ్రతకలేక కడతేరనులేక జ్ఞాపకాలే తోడని
నిశ్శబ్ధపు ఘోషలో తనకి తానే తడిసి నిటారుగా నిలచి..
నీరు పల్లమెరిగినా నిజమైన ప్రేమ తప్పక పండునని ఆశగా
కపటంలేని కలువ సృష్టి తీరును ఎదురీది ఎదురు చూస్తుండె!

ఏంకావట్లేదు..

ఆకలిని ఓర్చుకునే ఓపిక నశించి రుచులపై వెగటుపుడితే
పంచభక్షపరమాన్నాలు ఎలా ఆరగించాలో అర్థంకావట్లేదు!

ఒంటరితనపు ప్రియమైన శత్రువుతో ప్రేమలో కూరుకుపోతే
తోడుకై తనువుకు తాళి ఎలా కట్టించుకోవాలో తెలియట్లేదు!

చీకటికి అలవాటుపడిన చూపు వెలుగుపై విసుగుచెందితే
కాంతులీను భవిష్యత్తని కాటుకభ్రమని కళ్ళకు పూయట్లేదు!

నిరాశసెగల వేడికి పట్టుదలే నిట్టూర్పై కరిగికాలువై పారితే 
వెక్కిరించే మార్పుతో ఎక్కడికెళ్ళాలన్నా దారి కానరావట్లేదు!

స్వశక్తి సన్నగిల్లి స్వయంకృతాపరాధ వ్యధలతో ఆడుకోబోతే
అగుపించని ఎదభారంతో జీవితాన్నెలా నెట్టాలో చేతకావట్లేదు! 

నాకు నే నిబ్బరపడి నగ్ననిజంతో శూన్యంలో రమించబోతే 
కన్నీటికి చులకనైపోతానని తెలిసి కూడా నవ్వు రావట్లేదు!!  

అన్నీ జరిగిపోతాయి

అనుకోకుండానే అన్నీ అయిపోతుంటాయి
ఏదో విధంగా పనులు జరిగిపోతుంటాయి
న్యాయం కోరుకున్నవారికి దొరుకునో లేదో
తనువుకైన గాట్లగుర్తులన్నీ మానిపోతాయి!

అనుకోనివి ఇష్టంలేదు కాదన్నా అవుతాయి
భయంకరమైన రాత్రులూ గడిచిపోతుంటాయి
కన్నీళ్ళు ఆవిరై గుండెమంటలు ఎగసిపడగా
ఎదురు తిరిగితే మౌనమే జవాబులౌతాయి!

అడగలేదని ఆగిపోక అవసరాలన్నీ తీరతాయి
తప్పించుకోడానికి వంకలెన్నైనా దొరుకుతాయి
మరపు వరమై అన్నీ సవ్యంగా సాగిపోతుంటే
ఆత్మగౌరవం అలలై అంబరాన్ని తాకుతాయి!   

అలసిన ఆశలేమో అంతరంగాన్ని ఊరడిస్తాయి
అణచుకున్న ఆవేదన ఉధ్రేకంతో ఎర్రబడతాయి 
ప్రమేయం ఏమీ లేవన్న భాధ్యతలు పెరిగిపోతే
అనుకున్నా అనుకోకున్నా  జరుగుతాయి!

ఎలా చెప్పేది!?

నేడు నేను చెప్పాలనుకుంటూనే మళ్ళీ చెప్పలేకపోయాను
నాతోనే ఉండిపొమ్మని అరచి గోల చెయ్యాలి అనుకున్నాను 
వెళ్ళకుండా నాకోసం నన్నంటుండే శక్తి నీది అనుకున్నాను
చెప్పలేకపోయాను..చెప్పానన్న భ్రమలోనే బ్రతికేస్తున్నాను!

నేడు నిన్ను తనివితీరా హృదయానికి హత్తుకోలేకపోయాను
కౌగిలిలో బంధించి ఇరుశ్వాసలతోపాటు కరిగించలేకపోయాను 
నా ఊపిరున్నంత వరకూ నాతో ఉండమని అనలేకపోయాను
చెయ్యలేకపోయాను..ఏదో అనుకుంటా కానీ ఏమీ చెయ్యను!

నేడు నన్నూ నిన్నూ వేరుచేసేటి రేయినైనా ఆపలేకపోయాను
ఏమాయోచేసి నా మనోభావాల ముసుగుతో నిన్ను కప్పలేను 
నువ్వు లేని నా పరిసరాలన్నీ నవ్వుతుంటే నేనూ నవ్వలేను
నిస్సహాయురాలిని నేను..ఏబంధంతోను నిన్ను కట్టివేయలేను! 

నేడు నువ్వులేని నేను ఎంత అసంపూర్ణమో కూడా చూపలేను
అణువణువు నీ స్పర్శకోసం పడుతున్న తపన ఎలా తెలుపను
నువ్వు నావాడివై ఉండని ఏడ్చే ఎదఘోషను ఎప్పుడు చెప్పను
ఎన్నో చెప్పాలనుకునే నేను నేడేకాదు ఎప్పటికీ ఏమీచెప్పలేను!        

ఒక హాయైన భరోసా!

నీమైనపు మాటలు నన్ను కరిగించునన్న తపనలో
నన్ను కలవరపెడుతున్న ప్రశ్నలన్నింటినీ ఆవిరిచేస్తూ
నవ్వే నీమోము ఓడిన నన్ను గెలిపిస్తుందనుకుంటాను..



నీవు నా తోడునీడ అనుకోవడమనే భ్రమ భ్రాంతిలో
అందులో నేను ఎప్పుడూ మునిగి త్రేలుతూ ఆలోచిస్తూ
బయటపడనూ లేను ఒంటరిగా ఒదిగి ఉండనూలేను..



నీదంతా నాదే నీలోన ఉన్నదంతా నేనేనన్న ఊహల్లో
నన్ను నేను ఓదార్చుకునే నెపంతో నిన్ను తలుస్తూ
నా పై నేనే అలిగి ఆక్రోషంలో నిన్ను తిట్టుకుంటుంటాను..

అమ్మకానికో ఓటు



నాకు నోటు ఇస్తేనే ఓటు వేస్తాను... 
అనే జనారణ్యంలో బ్రతుకుతున్న నేను 
నా ఓటుని కూడా అమ్మకానికి పెట్టాను 
చిట్టా విప్పండి చేసిన ఉత్తమ పనులను
తన్నుకుపొండి కారుచౌకగా నా ఓటును
చదువూ జ్ఞానం ఉన్న ఓటు నాదంటాను!  


ఐదేళ్ళకి ఒకమారు వేలంపాట వేస్తాను...
ఎవరి సత్తా ఎంతో నేనప్పుడే పసిగడతాను   
కొనేవారి దిమాక్ బలుపు ఎంతో చూస్తాను  
గెలిస్తే చేస్తామనేవారికి వేలం ఎందుకంటాను
దేశాన్ని ఉద్దరించేవాళ్ళు చేసి తీరతారంటాను
అవినీతిని నాదైన రీతిన ఇలా ఆడుకుంటాను!

   
ఉత్తమ ప్రభుత్వం కోసం ఓటు వేస్తాను...
నాఓటు నాఇష్టం ఎంతకైనా అమ్ముకుంటాను
విలువలేని వ్యర్థానికి అడిగే హక్కు లేదంటాను 
నోటుతో కొనుక్కునేవారుంటే ఓటు వజ్రమంటాను 
రేటు పలికిన నాడు మహరాణిలా దర్జాగుంటాను
అలాగని అల్లాటపాగాళ్ళకు నా ఓటు అమ్ముకోను!  

ఎవ్వరు నువ్వు!?

నా చిన్న తప్పుల్ని కూడా భూతద్దంలో చుడ్డానికి
నువ్వు ఎవరని నన్ను నిలదీసి ప్రశ్నించడానికి!?

నా జీవితం నాది నాఇష్టమొచ్చినట్లు జీవించడానికి
నువ్వు ముందు నిన్ను ప్రశ్నించుకో నన్ననడానికి
నోరెలా వచ్చింది పిల్లాడు వంశోద్ధారకుడు అనడానికి
అమ్మాయి పరాయి సొత్తని వేరు చేసి మాట్లాడ్డానికి!

నా తనువు ఎలా కప్పాలో తెలుసు రక్షించుకోడానికి
నువ్వు నిర్దేశించి నిర్ధారించకు నిన్ను కప్పుకోవడానికి
తప్పు నేను చేస్తే సంసిద్దురాలినినే సరిదిద్దుకోవడానికి
మధ్యలో నువ్వెవరో అర్థం అవ్వకుంది నన్నడగడానికి!

నా రేపటి వృద్ధికి ప్రేరణ కాదు చెప్పుకొని ఊరేగడానికి
నువ్వు సుత్తపూసవి ఏం కాదు నన్ను సరిచేయడానికి   
గడిచిన కాలాన్ని తిరిగివ్వలేవు లోట్లు పూడ్చుకోడానికి
పోసుకోలు చెత్త మాటలు ఎందుకు కాలం గడపడానికి!

నా ఆలోచనలతో సరితూగవు నీ భావాలు చెప్పడానికి
నువ్వు తెలివైన వాడినని విర్రవీగకు జవాబులివ్వడానికి
సృష్టికర్తవా మగ ఆడవాళ్ళలో వ్యత్యాసం ఎత్తిచూపడానికి 
కన్నవాళ్ళు అసలే కారు మంచిచెడ్డలు ఏవో చూడ్డానికి!

(ఏ పనీ లేక ఆ అమ్మాయి అలా ఈమె ఇలా అంటూ చెప్పుకు తిరిగే ఆటలో అరటిపండులకు అంకితం)
    

మిగిలిపోనీ..

నా వలపు భావాలకు దిష్టి తగిలింది కామోసు
దిక్కుకొకటిగా ఎగిరిపోతే దిక్కుతోచక ఉన్నాను!

పంచిన అనురాగం పాచిపట్టి పాడైంది కామోసు
ఆపేక్షాకలిని అరువివ్వమని అడుక్కుంటున్నాను!

తపనపడే మనసుకి తాయత్తు కట్టాలి కామోసు
తాపత్రయం ఎక్కువై తలభారమై తిక్కగున్నాను!

వ్యధావేదనలు వెర్రెక్కి అరుస్తున్నాయి కామోసు
వేపమండలతో వదిలించుకోవాలి అనుకున్నాను!

గాయపడిన ఊసులకి ఏదో గాలిసోకింది కామోసు
ఉలిక్కిపడరాదని ఊరడించి విబూది రాస్తున్నాను!

బ్రతుకు భూతం నన్నింకా వదలకుంది కామోసు
బడితపూజ చేసి భరతం పట్టాలనుకుంటున్నాను!

ఆలోచనాక్షరాలు సయ్యపై పరుండాయి కామోసు 
పద్మార్పిత మధురభావంగా మిగిలితే బాగుండును!

మగాడివా!?


కన్నుమిన్ను కానక కండకావరమెక్కి
కామంతో మధమెక్కువై కొట్టుకుంటూ
ఒళ్ళుబలిసి తిరగబడలేని వారిపై బడి
దారుణంగా ఎగబడి అత్యాచారం చేసేటి
నువ్వు మగాడివా నీది మగతనమా!?

ఎక్కడ నుంచైతే పుట్టావో అక్కడే పెట్టి
విచక్షణ కోల్పోయి కళ్ళు మూసుకుని
రెండు నిముషాల సుఖానికి రాక్షసుడివై
మృగంలా మారి మీద పడి హింసించేటి
నువ్వు మీసం మెలేయడం న్యాయమా!?

ఆమె ఇష్టంలేదు వద్దని అరుస్తుంటే కొట్టి
తాళి కట్టించుకున్నాక పెళ్ళాం కదా అని
ప్రతాపమంతా చూపి ఫస్ట్రేషన్ తీర్చుకుని 
సాడిస్టులా సెక్స్ చేసి సంతతిని పెంచేటి
నువ్వు ఒకపెద్ద పుండాకోరంటే కోపమా!?

రాత్రి లేపి కలలో కులుకుతావటని మొట్టి
ఒళ్ళురక్కి రంకుగట్టి పరువు పక్క పరచి
సిగ్గులేకుండా లైంగిక వాంఛతో జబ్బచరచి
అంగము ఉన్నది దానికోసమే అనుకునేటి
నువ్వు మగాడినని నిరూపించ సాధ్యమా!?

ఏటిగట్టున ఎద..

మనసు మట్టికుండలాంటిది దాన్ని భద్రంగుంచన్నావు
మట్టికుండని గట్టిగా మలచినానని భరోసా ఇవ్వమంటే
కుమ్మరోడిని కాను కులికితే కుమ్ముతానంటున్నావు!

నా నాజూకు పలుకులకే పరవశించి ప్రేమించానన్నావు
పరవశానికి ప్రతిరూపంగా ఒక పట్టుచీరైనా ఇవ్వలేదంటే
నేతగాడిని కాను పట్టుకుంటే పట్టుచీరై జారిపోకన్నావు!

బట్టలెంత మురికైతేనేమి మానవత్వం ముఖ్యమన్నావు
మట్టిదేముంది మావా మంచినీళ్ళతో ఉతికేసుకోమనంటే
చాకలోడిని కాను చచ్చుసలహా ఇదని విసుక్కున్నావు!

పగలు కస్సుబుస్సలాడి రాత్రి ముద్దులతో ముంచేస్తావు
మాటలతో ముక్కలుచేసి మురిపాలతో కుట్లువేస్తావంటే
దర్జీని కాను కత్తిరించి కుట్లేయడానికని నవ్వుతున్నావు!

నిలువెత్తు బంగారాన్నని మభ్యపెట్టి వశంచేసుకున్నావు
నడుముకో వడ్డాణమైనా చేయించి విలువ పెంచరాదంటే
కంసాలిని కాను వగలుపోమాకే వగలాడి అంటున్నావు!

సముద్రమంత నీ జ్ఞానసిరులతో నన్ను కట్టిపడేసినావు   
స్వాతిముత్యమంటి స్వచ్ఛమైన నీవు సొంతమనుకుంటే  బెస్తవాడ్ని కానంటూనే నాఎదను ఏటిగట్టున విసిరేసావు!

ఏరికోరి ఎంచుకోగా నా గుండె రాజ్యానికి అధిపతివైనావు
నీ అనంతమైన సరససంపదలపై నాదేలే హక్కనుకుంటే
వృత్తి కాని రాజకీయ రాసలీలలాడి సంబరపడుతున్నావు! 

తప్పుతున్న లెక్కలు

యుక్తవయసొచ్చెనని సందేశంతో మొదలైన లెక్కలు
నెలనెలా క్రమం తప్పక వచ్చి అలవాటైన ఆ లెక్కలు
ఈమధ్య రాక అలుగుతున్నవి రెండుమూడు నెలలు!!

మదిమూల నీడై ఒదిగి జతగా పలుకరించిన లెక్కలు
అవసరం తీరెనో ఏమో మారాం చేస్తున్నవి ఆ లెక్కలు
అలవాట్లు మారేలా చిందులేసి చేసె అంకెలగారడీలు!!

తలపుకి రావలసినవి గుర్తురాక తప్పుతున్న లెక్కలు
వస్తుందనుకున్నప్పుడు రాక విసుగు తెప్పించే లెక్కలు
ముగిసిపొమ్మంటే వినక పట్టిస్తున్నవి ముచ్చెమటలు!!

అడ్డాలనాటి బిడ్డలు పెరిగి గెడ్డాలుపెంచి అడుగ లెక్కలు
అండాల సంఖ్య తరిగిపోయి తడబడుతున్నవిగా లెక్కలు
జవాబులేని చికాకులకి సమాధానం ఆగిన బహిష్టులు!!

శరీరమార్పుకీ మనుషుల్లో మార్పుకీ పొంతలేని లెక్కలు
అయోమయ గందరగోళంతో తైతెక్కలాడుతున్న లెక్కలు
ఇవన్నీ జీవితం తరిగిపోతున్నట్లు చేస్తున్న హెచ్చరికలు!!   
     

మారనా?

ఋతుపవనాలపై గాలితెమ్మెరయే అలిగింది
పువ్వులోని తేనెను తుమ్మెదొచ్చి తాగింది
జీవితం నడవడికనే మార్చి దారిమళ్ళింది
ఈ వంకన నేను నా మనసు మార్చుకొని
బ్రతుకు మతలబు తెలుసుకుని మెలగనా? 

పాతలోగిలి లోనికి క్రొత్తకిరణమొచ్చి వాలింది
మండుటెండకి మోముపై మెరుపు తరిగింది
చిలిపితనం గంభీరరూపానికి బానిసై ఒరిగింది
ఇదే అదుననుకుని నా రూపం మార్చుకుని
బంధాలు త్రెంచుకుని నేను ఎటైనా ఎగిరిపోనా?

కోయిల పావురంలా సమాచారం అందించింది
ఉడుత నిలకడగా నిలబడి ఉన్నది చెప్పింది
అవకాశం అస్తిత్వానికి అవసరమనే రంగద్దింది
ఇలాగైనా రంగువేసి నన్ను నేను మార్చుకుని
అబధ్దపు లోకానికి నా ప్రత్యేకతను చాటుకోనా?