నీ తపన!

పువ్వుపై వాలాలన్న ఈ తపన....

ఇది నీలో చెలరేగిన వింతైన ఆలోచన
తెలియదు ఆ మదికి నీదైన ఈ ఆలాపన!

పంచరంగులపై నీకేల యోచన....
అది తెలుపుపై సూర్యకిరణాల పరివర్తన
ఆకర్షణలకు బానిసవై చెందకు ఆవేదన!

నీకే సొంతం కావాలన్న భావన....
వాలితేనే వడలివంగిపోయే పువ్వుపైన
ఎందుకీ చెంచలమైన వాంచల జడివాన!

"ప్రేమించుకుందాం రా"

ప్రియమైన మిక్కీ మామ.... మినీ రాస్తున్నది ఏమిటంటే!!!
( అందరూ SMSలు, Mailలు చేస్తుంటే నీకిదేం మాయరోగం అనమాకు మామ )
మనం ఎంత ఇంగ్లీషోల్లమైనా మన వాలంటైన్ డే ని తెలుగులో చేసుకోవాలని బహు ముచ్చటగుంది.
అందుకే నువ్వు ఏడో తేదీన గులాబీని పంపిన రోజునుండి థింకింగ్.....థింకింగ్....థింకింగ్,
ఇంక ధైర్యం చేసి ఈరోజు రాసేస్తున్నా , ఈ రెండు రోజులు నువ్వు ఎలాగో తిట్టవు,
తిట్టినా ఎలాగో ప్రేమనంతా ఒలకబోస్తావన్న ధీమా....
ఇంకెందుకు ఆలస్యం???
"ప్రేమించుకుందాం రా".....
వాలంటైన్ వీక్ ( ప్రేమికుల వారం ) అంటే ఈ ఒక్క వారం ప్రేమించమని కాదు మామ....
ఇలా ప్రేమించడం మొదలు పెట్టిన కలసిన దగ్గరనుండి కడవరకు ఎన్ని వారాలు ఉన్నాయో
అన్ని వారాలు ఇది ఫాలో అవ్వమనీ ( మధ్య ఇంగ్లీష్ ఎందుకు అంటావా? ఎంతైనా ఇది ఇంగ్లీష్ పండగ కదా మామ అందుకే ఒగ్గెయ్! )
ఇంక మాటర్ లోకి వస్తే....ఇంక నీకు తెలుసు కదా మామ నా వీక్ పాయింట్ ప్రాసని కవితని చెప్పి తవికలు రాసి నిన్ను తికమక పెడతాను, ఇంకో మాట మామ...... ఇంగ్లీషును తెలుగులోకి మార్చేటప్పుడు పదాలు దొరక్కపోతే కూడా క్షమించెయ్!!!! ప్లీజ్...ప్లీజ్.....ప్లీజో ప్లీజ్!!!
అయినా నా మీద లవ్ తో నువ్వు కాదనవనుకో........
కాచుకో మరీ!!!:-) :-) :-)

7 ఫిబ్రవరి...
రోజ్ డే/ గులాబీ రోజు
అందమైన గులాబి పువ్వు
ప్రేమతో అందించు నువ్వు
విసిరింది ఆమె చిరు నవ్వు
గాలిలో తేలిపోయావు నువ్వు!











8 ఫిబ్రవరి...
ప్రపోసింగ్ డే/ప్రతిపాదన రోజు
గొప్పలు నీగురించి చెప్పెయ్
తనేమన్నా నువ్వు వినేసెయ్
ప్రేమిస్తున్నా అని చెప్పేసెయ్
కలలకు అంకురార్పణ చేసెయ!











9 ఫిబ్రవరి...
చాక్లెట్ డే/మిఠాయి రోజు
స్వీట్స్ & చాక్లెట్స్ తినిపించు
తీయదనాన్ని ఆస్వాదించు
నీలోని ప్రేమను తనకి పంచు
జీవితాన్ని అందంగా ఊహించు!












10 ఫిబ్రవరి...
టెడ్డీ డే/బహుమతుల రోజు
టెడ్డీని బహుమానంగా ఇచ్చిచూడు
అందులో ఉన్నది నీవేనని చెప్పిచూడు
హృదయానికెలా హత్తుకుందో చూడు
ఇరువురూ ఒకరికి ఒకరు ఈడు-జోడు!











11 ఫిబ్రవరి...
ప్రామిసింగ్ డే/ బాసచేసుకునే రోజు
చేతిలోన చెయ్యేసి ఒట్టు వేసుకో
తనని వదలి పోనని బాస చేసుకో
నీలోని భావాలని తనతో పంచుకో
భవిష్యత్తును నీకణువుగా మలచుకో!











12 ఫిబ్రవరి...
కిస్ డే/ముద్దు రోజు
ముద్దుముచ్చట్లలో ముందు ముద్దు
దీనికి ఉంటేనే బాగుంటుంది సరిహద్దు
అప్పుడప్పుడు చిలిపిచేష్టలు అదో ముద్దు
మితిమీరి ఇరువురూ దాటకండి హద్దు!











13 ఫిబ్రవరి...
హగ్ డే/ కౌగిలింత రోజు
భావోధ్రేకాల సమ్మేళనం కౌగిలి
మదిని చేస్తుంది ఇది చక్కిలిగిలి
మనసుదోచిన వాడి కౌగిలిలో చెలి
అది చూసి కొంటెగా నవ్వింది జాబిలి!











14 ఫిబ్రవరి...
వాలంటైన్ డే/ప్రేమికులరోజు
ఈరోజేనంట వాలంటైన్ డే
ప్రేమించే మనసుంటే 365 డే
ప్రతిరోజు మనకి ప్రేమికుల డే
హ్యాపీ హ్యాపీగా వాలంటైన్ డే!

తలపెందుకని?

సూటిగా అడిగాను మనసుని
ఈ ఒంటరితనం నాకెందుకని?
మనసు బదులు చెప్పలేనని
నిన్ను తలచింది ఎందుకని?

శ్వాసలేనిదే నేను లేనని
తెలిసి శ్వాసలో నీవెందుకని?
ఊపిరిని బిగపట్టాను ఆగమని
తన్నుకొచ్చింది నీతలపు ఎందుకని?

నీ తలపుల లేత కలువలని
మనఃసరోవరంలో విసిరావెందుకని?
తలపుల తడి ఆరనే లేదని
తెలిసినా దాహం తీరదు ఎందుకని?

నిన్ను మరచి పోవాలని
వేడుకుంటున్నా నిన్నేందుకని?
తలచినాను నిన్ను మరచితినని
కానీ మరింత దగ్గరైనావు ఎందుకని?

ఎందుకో ఏమో?

ఎందుకీ దాగుడుమూతలు? ఎందుకీ దోబూచులు?
నాలోనే ఉన్న మీకు ఎందుకీ ఎడబాటు దొంతరలు?
ఒంటరినైన నాకు మౌనంతో స్నేహం కుదిరింది
మౌనంగా భారమైన భాధని భరించాలని ఉంది
గత స్మృతులను తలచి మది పరితపిస్తుంది
గీసిన చిత్రాన్నే మనసు పలుమార్లు గీస్తుంది
చిత్రంలోని ముఖము మాత్రం అటు తిరిగుంది.

ఎందుకీ ఎదురుచూపులు? ఎందుకీ తడబాట్లు?
నాది కాని నాపైనే నాకెందుకిన్ని మమకారాలు?
పలుమార్లు ద్వారంవైపే చూపు మళ్ళింది
నాలో నేలేనని తెలిసి నన్నెవరో పిలుస్తుంది
ఎవరికోసమో నా హృదయం నిరీక్షిస్తుంది
ఏమిటో నాలోని వింత నాకే తెలియకుంది
నాదైన హృదయం వేరొకరికై స్పందిస్తుంది.

ఎందుకీ అలజడులు? ఎందుకీ కలవరింతలు?
నాకు చెందని నీపైనే నాకెందుకని ఆరాటాలు?
నిన్ను చూడాలని నామది కోరుకుంటుంది
నీవులేని చిరుగాలి కూడా చిరాకుపుట్టిస్తుంది
నవ్వుని నియంత్రించి ధుఃఖాన్ని మ్రింగుతుంది
పలకరిస్తే పెదవి విచ్చి గుండెలయ తప్పుతుంది
కలనైనా చూడాలని కనులు తెరచి నిద్రిస్తుంది.

"ఇలా నిదురపొండి"

"మత్తు వదలరా నిద్దుర మత్తువదలరా" అని జాగృతి పరచినా
"నిదురపోరా సామి నా ముద్దుమురిపాల సామి" అని నిదురబుచ్చినా
"నీలాల కన్నుల్లో మెలమెల్లగా నిదుర రావమ్మ రావే" అని జోల పాడినా
"నీవు రావు నిదుర రాదు" అని నిరీక్షించినా.....
ఇలా నిద్రపై ఎన్నో పాటలు పాడుకునే మనం.....
ఇలా నిద్రపోతే ఎలా ఉంటుందో అనే ఊహలకి.....
కవితా రూపకల్పనే "ఇలా నిదురపొండి"!!!!


వెల్లకిలా పడుకున్న వీరుడు
కలతలు ఎరుగని మగధీరుడు
కాస్త కబుర్లకి ప్రీతిపాత్రుడు
కావలసినంతే కష్టపడతాడు...




బోర్లా పడుకున్న ప్రతిమనిషి
కుచిత భావాలవైపు ఆకర్షి
తనదే వేదమనుకునే అభిలాషి
తీరుమారిస్తే కాగలడు మరోఋషి...





ఒకవైపు ఒదిగి పడుకున్న పడతి
వినయవిధేయతలే అత్యంతప్రీతి
ప్రేమ, ఆత్మస్థైర్యమే ఈమె మనోగతి
వీరిని మెచ్చును సకల జగతి...



ఒంటికాలిని వంచి ఒకవైపు నిద్రించు
ప్రతిదానికీ కలతచెంది కలవరపరచు
బేలతనమే వీరి నేస్తమై వెంబడించు
దిశమారిస్తే ధైర్యమే వీరి దశమార్చు...



ముడుచుకుని పడుకున్న నీవు
అసూయ స్వార్ధాలకి అదే నెలవు
చిరాకు విసుగు వీరి ఇంట కొలువు
మంచివారిని ఇవి దరిచేరనీయవు...






అరచేతుల్లో ఆదమరచి నిద్రించువారు
తెలివిగా ఆలోచించి పనులు సాధిస్తారు
తొందరపడి ఎవరినీ అంతగా నమ్మరు
నమ్మినవారిని ఎన్నటికీ విడనాడరు...







క్రింది నుండి ఒళ్ళంతా కప్పిన ముసుగు
నీలోనే దాగింది బిడియం మరియు సిగ్గు
తొలగించు మేకపోతుగాంభీరపు ముసుగు
లేకపోతే నీవు కాంచలేవు లోకపు వెలుగు...


నిర్భయముగా నిదురించలేనివాడు
గతాన్ని పలుమార్లు తలచి రోధిస్తాడు
ఒంటరి అయి జీవితాన్ని సాగిస్తాడు
ఎదుటివారి నుండి జాలిని కోరతాడు...





కాలుపై కాలేసుకుని దర్జాగా పడుకో
నడవడికను త్వరలో నీవే మార్చుకో
మార్పుపులు నచ్చక పోయినా ఒప్పుకో
ఇంకెలా పడుకోవాలో నీవే నిర్ణయించుకో...

అలుగకు....క, కా, కి, కీ, కు, కూ:-)

చాలించు నీవింక అలుక, పగలేరేయిగా కానీయ"క"

ఎందుకింత నీకు అలుకా, చెంతలేనని నేను కిను"కా"

కునుకు రానీయి కంటికి, అలుక సరిపడదు ఒంటి"కి"

వీడను నిన్ను ముమ్మాటికీ, నీవే నా చెలి జన్మజన్మల"కీ"

చెలియా! నాపై అలుగకు, నవ్వుని దూరం చేయ"కు"

నా మది తెలుసు నీకూ, అయినా అలిగావెందు"కూ"

నీవలిగితే నేను(పదాలే కరువైనట్లు భావించాలి) "క్రు","క్రూ"

అలుకమాని సొంతముకావే నాకె, వెన్నెలవిరయు నీనవ్వు"కె"

యుగమైగడిచె నీ క్షణం అలుకకే, నీవింక అలుగ"కే"

వేచి ఉంటా నీ ప్రేమకై, ఎదురు చూస్తున్నా ప్రేమతో నీ"కై"

నన్ను నీ కంటిపాపలా కాచుకొ, నామనసున నీవే చూసు"కొ"

అలిగి నీవలుసెందుకో, నీడైనా నిన్ను వీడిపొతుంది తెలుసు"కో"

అలుగక కౌగిలిలో గిలి నాకిస్తే మిగిలేది "కౌ"

అది నా మదిని మీటెడి తీయని తమ"కం"

పదమొకటి చెప్పవే దాని ఆది-అంత్యము "కః"

తిరిగిరాక...

పరిచయమే కదా అనుకుంటే ప్రణయం అయినావు...
పరిణయబంధం వలదని నా శ్వాసలో బంధీవైనావు!

తోడైతే మరుగున పడతానని నా నీడగ అయినావు...
కౌగిలిలో కరిగిపోతావనే కంగారులో నాప్రాణం నీవైనావు!

కంటపడి కలవర పెడదామనుకుని కనుమరుగు అయినావు...
కలలో కనబడితే కలతచెందెదనని తలచి కలలే నీవైనావు!

మాటలకి మౌనందాల్చి నా ప్రతిమాట నీవే అయినావు...
మనసిచ్చి మరచిన నీవు మరణం కూడా కాకున్నావు!

ఊహల ఊయలూగుతూ ఆనందానికి దూరం అయినావు...
మరచిపోదామని తలచిన తలపులో కూడా నీవే గుర్తొచ్చావు!

ఆటుపోటుల కాలక్రమంలో ఆశల అలవోలె అయినావు...
పశ్చాతాపంతో తిరిగివచ్చిన నీవు ఎన్నడూ నన్ను వీడిపోవు!

2012....స్మైల్స్:-)

(-: హ్యాపీ న్యూ ఇయర్....అందరికీ:-)

కొన్నైనా కావా!!!

చేతిలోన చెయ్యేసి చెప్పేయవా!
నీకు నేను నాకు నీవున్నామని.
ఏకాంతవేళ ఊసులెన్నో చెప్పేయవా!
జీవితమంతా ఆనందమయమేనని.

నీ కౌగిలిలో నన్ను బంధించవా!
పట్టుతప్పిన వేళ పడిపోనీయనని.
సేదతీర్చి ముంగురులు సవరించవా!
జోలపాటై నన్ను జో కొడతానని.

భుజాలపై తలవాల్చనీయవా!
నా యోగక్షేమాలు నీవేనని.
గుండెల్లో నిదురించనీయవా!
ఆ సవ్వడిలో నాపేరు వినాలని.

కనులుమూస్తే కలలో నీవే రావా!
కలనైనా నన్ను ఎన్నడూ వీడనని.
ప్రతిక్షణం నా తలపు నీవే కావా!
అణువణువునా ఒదిగి ఉన్నావని.

కోయిల పాటై వినిపించవా!
ఎల్లవేళల వసంతం మనదేనని.
కలసి నాతో కడవరకూ సాగిపోవా!
ప్రేమకు నిర్వచనం మనమేనని.