మానసచోరుడా

ముద్దుగా మురిపించే మాటలు ఎన్నో చెప్పి
ముంగురుల లోనికి మునివేళ్ళను జొప్పించే
నీ గాలిచేష్టలెంత చిలిపివో తెలిసెలే చిన్నోడా

రెపరెపమంటూ రెప్పలపై నీ చూపులు గుప్పి
చెంపలు ఎరుపు ఎక్కేలా నవ్వుతూ కవ్వించే
నీ అక్షరమాలాల్లికలు అలరించెనులే అల్లరోడా

నిగూఢంగా నిలువుదోపిడీ చేసి కలలతో కప్పి
జ్ఞాపకాల మాయమంత్రం ఏదో నన్ను ముంచే
నీ కపటంలేని వలపుని ఎరిగితిలే కంత్రీగాడా

చిక్కరాదు అనుకుంటూనే నీ గుండెకు నే చిక్కి
పొరనై పెనవేయ సురక్షితమని నామది ఎంచే
నీ శ్వాసలో చేర నా శ్వాస వీడాలిగా ప్రియుడా...