ఇలా అనిపిస్తుంది..

టక్కున ప్రాణం పోతే..
బాగుండును అనిపిస్తుంది!
అభిమాన ఆపేక్షల కోసం
ఆరాట ఆతృతలు వద్దు..
ఇక చాలించాలనుంది!

జీవించింది చాలు ఎవ్వరూ
ఛీ ఛీ అనకముందేగానే..
అంతరించి పోవాలనుంది!

జీవితానికి ఒకర్థం ఉన్నప్పుడే..
ఆనందంగా వెళ్ళిపోవాలనుంది!
కొందరి హృదయాల్లో చోటు
కాసింత అభిమానం ఉందన్న..
తృప్తితో అంతమవ్వాలనుంది!

ప్రశాంతంగా నిద్రపోతున్నప్పుడు
కలలుకంటున్న కనులను..
శాశ్వితంగా ముయ్యాలనుంది!

అనుకున్నవేవీ ఎలాగో జరుగలేదు..
ఊపిరైనా ఇష్టంగా వీడాలనుంది!

లేనిదున్నట్లు..

ఎలా ఉన్నావని అడిగినంత సులభమేం కాదు

బాగున్నానని లేనిది ఉన్నట్లు అబద్దం ఆడటం

ఏడుపు గొంతును నవ్వుగా మార్చి మాట్లాడ్డం

అన్నీ కోల్పోయి కూడా ఆశగా బ్రతికేయడం..

ఎందుకూ పనికిరాని వారితో ఉపయోగం లేదు

మాట్లాడితే సమస్యతో పాటు సమయం వ్యర్థం

వారు భారమూ అంతకు మించి అప్రయోజనం

అన్నీ తెలిసిన జ్ఞానులు చేసే పని వదిలేయడం..

ఎటువంటి మార్పు లేనివారికది కష్టమేం కాదు

ఒకమనిషి స్థానంలో మరోమనిషితో సాంగత్యం

బరువు బాధ్యతల నడుమ బిజీగా గడిపేయడం

అన్నీ సాగుతుంటే మనసు మారటం సహజం..

ఎలాంటి నష్టం జరుగలేదుగా అవగాహన లేదు

ఏడ్చి కావాలని అడుక్కోవడమన్నది అనధికారం

మరువలేని మనసుతో జీవించడమే ఒక నరకం

అన్నీ చెప్పుకుంటే చులకన అవ్వడం ఖాయం..

ఎదను ఎదతో చేర్చి చర్చించడం పోలికేం కాదు

గాయమైన గుండెకే గాట్లు చెయ్యడం అన్యాయం

లేని మమకారం కోరుకోడం రాచపుండంటి రోగం

సలహా సమర్ధింపుల సంధిసంపర్కం తాత్కాలం.. 

ఇద్దరమొకటి కాదు..

నాకేమో భావోద్వేగాలజడిపాళ్ళు ఎక్కువ
తనకేమో చలించని నిశ్చింతే మక్కువ..

నాదేమో సున్నితసరళలజ్జాపూరిత తత్వం
తనదేమో అన్నింటా ఒకే సమానత్వం..

నాకేమో విరహవైరాగ్యవలపొక అనుభూతి
తనకేమో అవన్నీ పనికిరాని పురోగతి..

నాదేమో కన్నీటితరంగకెరటాలవ్యధ హోరు
తనదేమో నిలకడ జీవిత కడలి జోరు..

నాకేమో చిత్తశుద్ధిక్రియాక్రమంటే భలేఇష్టం
తనకేమో ఒక్కటే పట్టుకోమంటే కష్టం..

నాదేమో గందరగోళగాభరాగమ్య పరిస్థితి
తనదేమో తెలివిగా నిలబడ్డ తటస్థస్థితి..

నాకేమో స్వార్ధపూరితప్రేమచేష్టలు కావాలి
తనకేమో అవి జీవితంలో భాగమవ్వాలి..

తప్పు నాదే..

ఎందరో అపరచితుల గురించి తెలుసుకుని

వారిని చదవడమే సరిపోయిందేమో అతడికి

నేను మాత్రం పరిచయమై కూడా పరాయినై

అతడి లోకంలో చిత్తుపుస్తకమై అమ్ముడయ్యా!

ఎందరినో అడిగి నాగురించెన్నో తెలుసుకుని

నా మనసుని చదివేసి నాకు దగ్గరైన అతడికి

నేను ఉసిగొల్పిన ఆలోచనలేవో అతడి ప్రేరణై

అతడు రాసిన గ్రంధంలో నేనో పంక్తినయ్యా!

ఎందరి మనోభావార్ధాలనో బాగా తెలుసుకుని

వారిమనసు మెప్పించడమే సరిపోయె అతడికి

నేను మాత్రం అంతరంగాలోచనల్లో పదిలమై

అతడి బాధ్యతల్లో బంధాలప్పుడు బరువయ్యా!

ఎవరితోనో నన్నునే పోల్చిచూసి తెలుసుకుని

నా మనోభావాలను చవమని చెప్పా అతడికి

నేను ఇలా అతిగా ప్రేమించేసానేమో చులకనై

అతడి దృష్టికి నేనిప్పుడు ఎంతో అలుసయ్యా!