తెలియనితనం..

చిన్నప్పుడు అల్లరిగా ఎగిరిగెంతులతో తెలియలేదుకానీ..

సమయం రావడం వచ్చి వెళ్ళిపోవడం నేను చూడలేదు!

సూర్యుడు ఉదయించి అస్తమించడం చూసా అంతేకానీ..

అదృష్టపు ఆరోహణ అవరోహణలు నాకస్సలు తెలియదు!

ప్రతీపని శ్రద్ధానిష్టలతో సాధించాలనే ప్రయత్నం చేసాకానీ..

విజయమెప్పుడూ నన్ను వరించి అందలం ఎక్కించలేదు!

 

కనులుమూసి నిదురపోయినప్పుడు కలగన్నాను కానీ..

ఆ అందమైన కలలు ఫలించి ఆనందాన్ని ఇచ్చిందేలేదు!

గోళ్ళు పెరిగితే గుచ్చుకుంటాయని కత్తిరించుకున్నా కానీ..

మనుషులపై మమకారం పెంచుకుంటే బాధని ఎరుకలేదు! 

పాలపళ్ళు ఊడి జ్ఞానదంతాలొచ్చి ఊగుతున్నాయి కానీ..

లోకంలోని కుళ్ళూ కుతంత్రాల గురించి అవగాహనేరాలేదు!

 

వయసు పైబడింది ఇంకేం సాధించాలని అడుగుతారు కానీ..

చచ్చేదాకా ఏదోకటి చెయ్యడమే జీవితమని తెలియడంలేదు!