విత్తునై వెలగాలని..

క్రొత్తపంధా

నేను భావాలోచలతో యుద్ధం చేసి అలసిపోకుండా 

అక్షర సైనికులందరూ నన్ను దాడికి తలపడమంటే

పదకవాతాలకు అధిపతిరాలినై అలరించబూనుకున్నా

మెప్పించాలన్న ధీక్షతో నా శక్తిని ఉసిగొల్పుతున్నా!

నేను అనుభవాలకి రంగులద్ది భావాలు చెడిపోకుండా

రసరమ్య కావ్యాలనే లిఖించాలని ఊహలు పట్టుబడితే

లిపిలేని కలలకు రేపు నాదన్న రసాయనం పూస్తున్నా

వాక్యాలు మనసుని తాకి పరిమళింప ప్రయత్నిస్తున్నా!

నేను ఇకపై నిరాశావేదనల ఊసులన్నవే రచించకుండా

సమతాలౌకిక సామాజిక ప్రయోజన పదమాలల్లమంటే   

నన్ను నేను గెలవకపోతి రచ్చ ఏం గెలుస్తా అంటున్నా 

అయినా కొత్తగా అక్షరప్రయోగం ఒకటి మొదలెడుతున్నా!

నేను సంఘ సంస్కరణోద్యమంటూ మాటలు చెప్పకుండా

మార్పుకై నిఘంటువులో సున్నిత పదాలు వెతకబోయి

సమసమాజ నిర్మాణ పునాదుల పుస్తకం చదువుతున్నా       

మనిషినీ మానవత్వాన్ని బ్రతికించే కావ్యక్షేత్రంలో నేనున్నా!   

అస్థిర బంధం

సంబంధానికి సరైంది స్నేహం అనుకున్నాను
స్నేహమే ప్రేమగా మారుతుంటే సై అన్నాను

బంధాన్ని గట్టి పరచాలని బావాని పిలిచాను
బావలో బలం లేదంటే నిజమేనని నమ్మాను

మామాని పిలిచి మమతానురాగాలే చిలికాను
మరులుగొలిపేంత మత్తులేదంటే ఊరకున్నాను

కన్నా అంటూ పిలిచి కపటమేలేదని తెలిపాను
కలవరింతపెట్టే పిలుపంటే కామోసనుకున్నాను

ముద్దుపేరుతో పిలిచి మురిపాలు గుమ్మరించాను
ముద్దులియ్యమంటే హద్దు దాటేనని మానేసాను

నా విశ్వమే నువ్వంటూ వీడకని వేడుకున్నాను
వలపు పొరకు బంధం అక్కర్లేదంటే ఇంకేమనను

ఆప్యాయంగా అల్లుకున్న అస్థిర బంధాన్ని నేను
తుప్పట్టిన లాంతరు వెలుగులా నవ్వుతున్నాను!  

వెర్రిలోకం

వెర్రిది పిచ్చిది పనికిరాని పాగల్ లోకం ఇది
వద్దన్నా వ్యక్తుల్ని వార్తాపత్రికలా చదివేస్తుంది
ఏదోకరోజు రూపం వెనుక దాగింది చూస్తుంది
వాస్తవాన్ని తెలుసుకునే ప్రయత్నం చేస్తుంది!

దాచింది చదవలేనిదేదో నెమ్మదిగా తెలుస్తుంది
అంత వరకూ ఆగని లోకం ఏదేదో ఊహిస్తుంది
వ్రాయని అంశాల పెద్దనిఘంటువే దాగుంటుంది
ప్రపంచానికి కనబడని మరోకోణమే మనిషన్నది!

కన్న కలలను బ్రతికించుకునే హక్కు నీదీ నాది
ఎవరికి తగ్గ నైపుణ్యం వారిలోనే కుదించబడుంది
నువ్వు నువ్వే నేను నేనేనన్న ప్రత్యేకత మనది
నిజం నేస్తమై సహనం సన్నిహితగా ఉంటానంది!

నవ్వు వెనుక వ్యధను దాచే వ్యక్తిత్వం కొందరిది
మదిగాయానికి చేసే మోసపూరిత అలంకారమది
మనసువిప్పి నవ్వక బహిరంగంగా ఏడ్వలేనన్నది
నిజాన్ని ఎందుకు చూపకున్నామో తెలియకుంది!

మ్యాడ్ మెంటల్ పిచ్చి పైత్యం పట్టిన లోకం ఇది
వారిది కాక ఎదుటివారి జీవితాన్ని చదువేస్తుంది 
ఇతరులు మనలా ఉండాలని ఎందుకో కోరుతుంది
అందుకే మతిలేని లోకాన్ని వదిలేయమంటుంది!

దశమరసం

ఆరంభంలోనే శృతిమించిన శృంగారం దక్కదని తెలిసి

మాటలెన్నో చెప్పి ప్రేమతేనెకత్తి మదిలో దించి పోతూ

హాస్యం హద్దులు దాటినా పర్వాలేదని కబుర్లెన్నో చెప్పి

కరుణరసపు గూటి చిరునామా చెప్పమని బ్రతిమిలాడి

ఓపిక నశించి విసుగు చెందితే రౌద్రం వద్దని వేడుకుని

ఏదోలేనని నవ్వితే వీరత్వం తమదని తెగమురిసిపోయి

విరగబడి నవ్వి భయంకరమైన చిత్ర విన్యాసాలెన్నో చేసి

భీభత్సాన్ని సృష్టించి అన్నీ అద్భుతం అనేలా మరపించి

    ఏది ఏమైనా శాంతం వహించాలంటూ పాఠాలు చెప్పడం      

ప్రేమలో కొంగ్రొత్త విద్యలంటూ ప్రేమించబడలేని రానినాడు

వలలో పడ్డ పిట్ట ఉసురు మనకేల అనుకోవడం దశమరసం

నవరసాలు మనల్ని కాదు పొమ్మని పరుల చెంత చేరితే

అన్నీ కలిసిన ఎందుకూ కొరకాని ఈ దశమరసం ఉత్తమం!!

భ్రమలో ఉన్నావేమో..

మారిన సమయపు మాయావలయం చూస్తూ మేల్కుని 

కనులు మూసుకుని గడిపే కాలాన్ని కలగంటున్నావేమో!

తామరాకుపై నీటిబొట్టంటి  ప్రేమసంతకాన్ని గుండెపై చూసి 

ఆవిరైన నీటిరాతల్లో  తీపిజ్ఞాపకాలు వెతుకుంటున్నావేమో!

  

వెన్నెల్లో కానరాని వెలుగును వేకువ వెలుగుల్లో వెతుక్కుని

ఆశతో మరోమారు మరపురాని బంధాన్ని పేనుతున్నావేమో!

దూరమైపోయిన ఆనందం గుండె గుర్తుల్లో దాచిందంతా తీసి 

నేలనింకిన నిరాశకి ఎత్తుపల్లాల బాటని చూపుతున్నావేమో!

ప్రేమంటే రెండుశరీరాల కలయిక కాదన్న సిద్ధాంతం వల్లించి 

ఆటుపోట్లు లేని జీవితమేలేదన్న వేదాంతం వల్లిస్తున్నావేమో!  

ప్రేమహంతకుడు..

"ప్రేమించు ప్రేమను నీవు ప్రేమతో పంచూ
అది రెట్టింపు ప్రేమను నీకు అందించు..."
పద్మ ప్రేమకే అర్పితమని కబుర్లెన్నో పలికి
ప్రేమ భావాలను మనసు నిండా నింపితే
ప్రేమించి ప్రేమించానని భరోసా ఇవ్వమంటే..
బలమైన బంధానికి బానిసను మన్నించమనె!
ప్రేమించిన మనసు బ్రతకడం రాక చావలేక
అనుకున్నది ఒకటి జరిగె మరొకటని వగచి
మార్గం మార్చి నడువ చేయి అందించమంటే..
కన్నవాళ్ళు కాళ్ళే కాదు చేతులూ కట్టేసారనె!
నచ్చింది చేయాలనుకుంటే అడ్డురాని ఆటంకాలు
నచ్చనివి వద్దనడానికి వంకలెన్నోనని మనసంటే
ప్రాధాన్యతనిబట్టే ప్రణయమైనా పని ఏదైనా అని..
ప్రేమించడానికి అవసరంలేని మిగతా అవయవాలనె!
జీవితపు చివరిమజిలీ వరకూ భంగిమలు మారుస్తూ
ప్రేమను నాలో చంపేసిన నా ప్రేమికుడికి నజరానా..
నవ్వుతూ బ్రతుకుతున్నాననే భ్రమని కలిగించానంటే
ఇంట గెలవకపోయినా నా ప్రియుడు రచ్చ గెలుస్తాననె!  

మాట వినని వలపు..

నేను ఎన్నడూ ప్రేమించకూడదనే అనుకున్నా
నిన్ను చూసి నా గుండె నాకే ద్రోహం చేసింది!
జీవితం ఆడి పాడుతూ హాయిగా గడిపేస్తున్నా 
అనుకోకుండా ఈ ప్రేమరోగం నాకొచ్చి సోకింది!

కునుకు కరువైయ్యింది అంతే కదా అనుకున్నా 
ఎడబాటగ్ని లోపల నరాలను దహించి వేస్తుంది!
ప్రేమిస్తే ఒకజీవితభాగం పూర్తని సరిపుచ్చుకున్నా
ప్రేమకెన్ని ఆచారవ్యవహార ఇబ్బందులో తెలిసింది!

వరించి వ్యధపడ్డ వారిని చూసి వెర్రని నవ్వుకున్నా
వ్యధలు పీడిస్తే వలపుజాడ్యం వ్యసనంగా మారింది!
రాత్రులు కలలతో కాపురం చేస్తే సహజమనుకున్నా
మనసిచ్చి పుచ్చుకున్న వారికిదే శిక్ష అనిపిస్తుంది!
     
తప్పు తప్పూ ఇకపై ప్రేమించడం మానాలనుకున్నా
కానీ.....నా గుండె నామాట ఎప్పుడు వినిచచ్చింది!

సాక్ష్యపు ఆనవాలు

జీవిత నాటకంలో కల్మషం లేక మనసారా నవ్వి నవ్వించి
అంతరంగానికి పరిమితులే గిరిగీయనప్పుడు తెలియలేదు 
చేసిన కర్మలతో నేను పోషిస్తున్నది ఒక కీచురాయి పాత్రని!

గుప్పెడు గుండెని కరిగించి సముద్రమంత ప్రేమను పంచి
ఆకాశమంత ఆనందాన్ని కోరుకుంటేనే కానీ తెలిసిరాలేదు
కరిగే గుండెకు ఇవ్వడమే తప్ప ఆశపడి అడగడం తప్పని!

అనురాగాన్ని అలల ఆటుపోటు చేసి ఎగిరెగిరి ఆరాటపడి 
మరింత ప్రేమనిచ్చి మొహం మొత్తిందంటే కానీ తెలీలేదు 
ఏదైనా సరే అడిగినంత మాత్రమిచ్చి లేదని బెట్టుచేయాలని!

కోల్పోయిన ఉనికిని శోధిస్తూ గుండె తడారిపోయేలా తపించి
అస్తిత్వం రూపాంతరించి ఆనవాలు పట్టనప్పుడైనా తెలియదు
పలికే మాయమాటల ఇరుకులో ఊపిరాడని ఉపేక్షిత గీతమని!

అనేకాలోచనల త్రొక్కిసలాటలో ఓరిమినే అత్తర్ల ఊపిరిగా పీల్చి 
అడకత్తెరలో పోకచెక్కనై నలుగుతున్నా కానీ తెలియడంలేదు
నా నీడ కూడా నాతో వెలుగులేనిదే వెంటరాదని నాది కాదని!