కొన్నైనా కావా!!!

చేతిలోన చెయ్యేసి చెప్పేయవా!
నీకు నేను నాకు నీవున్నామని.
ఏకాంతవేళ ఊసులెన్నో చెప్పేయవా!
జీవితమంతా ఆనందమయమేనని.

నీ కౌగిలిలో నన్ను బంధించవా!
పట్టుతప్పిన వేళ పడిపోనీయనని.
సేదతీర్చి ముంగురులు సవరించవా!
జోలపాటై నన్ను జో కొడతానని.

భుజాలపై తలవాల్చనీయవా!
నా యోగక్షేమాలు నీవేనని.
గుండెల్లో నిదురించనీయవా!
ఆ సవ్వడిలో నాపేరు వినాలని.

కనులుమూస్తే కలలో నీవే రావా!
కలనైనా నన్ను ఎన్నడూ వీడనని.
ప్రతిక్షణం నా తలపు నీవే కావా!
అణువణువునా ఒదిగి ఉన్నావని.

కోయిల పాటై వినిపించవా!
ఎల్లవేళల వసంతం మనదేనని.
కలసి నాతో కడవరకూ సాగిపోవా!
ప్రేమకు నిర్వచనం మనమేనని.