ఎందుకో ఏమో?

ఎందుకీ దాగుడుమూతలు? ఎందుకీ దోబూచులు?
నాలోనే ఉన్న మీకు ఎందుకీ ఎడబాటు దొంతరలు?
ఒంటరినైన నాకు మౌనంతో స్నేహం కుదిరింది
మౌనంగా భారమైన భాధని భరించాలని ఉంది
గత స్మృతులను తలచి మది పరితపిస్తుంది
గీసిన చిత్రాన్నే మనసు పలుమార్లు గీస్తుంది
చిత్రంలోని ముఖము మాత్రం అటు తిరిగుంది.

ఎందుకీ ఎదురుచూపులు? ఎందుకీ తడబాట్లు?
నాది కాని నాపైనే నాకెందుకిన్ని మమకారాలు?
పలుమార్లు ద్వారంవైపే చూపు మళ్ళింది
నాలో నేలేనని తెలిసి నన్నెవరో పిలుస్తుంది
ఎవరికోసమో నా హృదయం నిరీక్షిస్తుంది
ఏమిటో నాలోని వింత నాకే తెలియకుంది
నాదైన హృదయం వేరొకరికై స్పందిస్తుంది.

ఎందుకీ అలజడులు? ఎందుకీ కలవరింతలు?
నాకు చెందని నీపైనే నాకెందుకని ఆరాటాలు?
నిన్ను చూడాలని నామది కోరుకుంటుంది
నీవులేని చిరుగాలి కూడా చిరాకుపుట్టిస్తుంది
నవ్వుని నియంత్రించి ధుఃఖాన్ని మ్రింగుతుంది
పలకరిస్తే పెదవి విచ్చి గుండెలయ తప్పుతుంది
కలనైనా చూడాలని కనులు తెరచి నిద్రిస్తుంది.