అమ్మకానికో నవ్వు

అందరూ నవ్వుతుంటే లోకం ఎందుకు చింతిస్తుంది?
కొందరు గాయపడి నవ్వితే, నిరీక్షణలో నవ్వేది కొందరు
కలలసౌధాలలో ఖుషీగుంటే, నిజం జీర్ణించుకోక కొందరు
కొందరు కష్టాల్లో నవ్వెతికితే, మత్తులో నవ్వేది కొందరు
ప్రకృతి అందాల్లో ఆనందంగుంటే, విధికి బలై ఇంకొందరు
కొందరు మౌనంగా కళ్ళతో నవ్వితే, పైకి నవ్వేదింకొందరు
ఇన్నివిధాలుగా నవ్వుతున్నా తృప్తిలేదు ఎందుకని?
పలకరింపుగా నవ్వి పనులు చేయించుకునేది కొందరు
పనిలేనిదే పళ్ళికిలిస్తే పిచ్చివాడనుకునేది మరికొందరు
ఎదుటివారిని చూసి ఓర్వక ఏడవలేక నవ్వేది కొందరు
సుఖఃధుఃఖాలను ఒకటేనని తలచి నవ్వేది అతికొందరు
ధీనమైన పేదనవ్వుని సొమ్ము చేసుకునేవారు కొందరు
భావాలకి అద్దమైన నవ్వు, నిజాల్ని కప్పే ముసుగైనది
మంచో చెడో కానీ నవ్వు నేడొక వ్యాపార సాధనమైనది!