వృక్షవేదన..

మట్టితల్లి ఎదను చీల్చుకుని మొలకగా నేను పురుడు పోసుకుని మనుషులందరికీ ఎంతో సేవ చేసుకుని మహావృక్షమై ఎదగాలని ఆశపడితినో లేక నేను అందమైన కలనే కంటినో తెలియక పోయె నా ఈ గుండెఘోషను తీర్చు మానవజాతే లోకంలో కొరవడిపోయె! మమకారం మరచి అవసరానికి అన్నింటా వాడుకుని నన్ను పీకేసినా అమ్మలా మిమ్మల్ని చూసుకుంటూ ఆకలి వేసిన నాడు ఆహారమైనా సేదతీరేవేళ మంచమై, చేతకాని నాడు చేతికర్రగా మారి ఊతమిచ్చాను పాడుగాలిని కడుపులో నింపుకుని ప్రాణవాయువు మీకు ఇస్తున్నాను! మలినం లేనట్టి మనసుతో పచ్చగా ఎదిగి అందరి ఇచ్ఛా కావాలని బ్రతుకంతా మనిషితోటే పయనమై చితిదాకా మీతో కలిసుండాలని కంకణం కట్టుకున్న నాపైనే కక్షగట్టి నరుకుతుంటే కట్టెనై కాలుతున్నా భగవంతుడే కలిపిన బంధములే ఇదని సర్దుకుని గాలినై వీస్తున్నా! మతలబులతో ముడిపడ్డ మనిషి నాకు పుట్టెడు కష్టాలు కలిగించినా ఓర్పుతో అన్నీ సహించి అక్కున చేర్చుకుని మీకు నీడను ఇచ్చినా వేరులో దాచిన ఔషధాన్ని ఇస్తి, నా కొమ్మని నీకు ఆయుధంగా చేస్తి ఇన్ని చేసిన నన్ను మీరు చంపుతుంటే నేలరాలుతూ లోలోన రోధిస్తి! మంత్రం ఏదో జరిగిపోయి మాయతో రెండు చేతులు నాకు మొలిస్తే నా ఒంటిపై నీ చేయి పడనీయక వృక్షమై నీకు భిక్ష అయ్యేటి దాన్ని మానవా.....మనసు ఉన్న మనిషివి కదరా నీవు ఇకనైనా మారవా అంకురార్పణ మొదలు అణువణువూ నీకే అర్పితమని తెలుసుకొనరా!

25 comments:

  1. తాను ఉన్న చోటుని మరిచిపోదు
    ఎంత ఎదిగినా ఒదిగి చల్లని నీడను సమకూర్చే

    తాను కాలాలన్నిటిలో సహనంగా ఉంటూనే
    రాళ్ళతో తనను గాయ పరచినా గాని తీపి ఫలాలను సమకూర్చే

    మహావృక్షమై నీడనిచ్చే చెట్టు.. కాదు ఎవరికి చేటు
    గింజను ఈ రోజున నాటితే.. తరతరాలకు సేవలందించే

    ప్రకృతి ఒడిలో పచ్చల హారంలా
    సేవ తాత్పర్యతను ఆఖరి నిమిషం వరకు బోధించే

    నైస్ థీమ్ ఆన్ ఇంపార్టన్స్ ఆఫ్ ఫోలియేజ్ కంజర్వేషన్ ఫర్ కరెంట్ యాండ్ అప్కమింగ్ జెనెరేషన్స్..

    Even for the Timely Rains, Easy Season Changes, Ground Water Balance, Erosion Check, and as Pollution Filter, the Trees play a pivotal role in the Nature.

    Awesome Poem, Padma Gaaru

    ReplyDelete
  2. మనిషి మనుగడకు చెట్లు ఆధారం వాటిని కాపాడుకోవడం మన ధర్మం.. చక్కగా చెప్పారు

    ReplyDelete
  3. ప్రేమాయణం అంటే ముఖం మొత్తినట్లు పద్మార్పితకు
    లోక సంస్కరణోద్యమము వైపు పయనించదొడిగె ఆలోచనలు👍

    ReplyDelete
  4. వృక్ష వేదన ను ఆలకించి, ఆలోచించి, ఆవేదన తో అక్షర అర్పితం చేసి అందించిన పద్మార్పిత గారికి అభినందనలు

    ReplyDelete
  5. ఎన్ని దెబ్బలు వేసినా ఎదురాడదు చెట్టు
    ఎన్ని కోతలు కోసినా మాటాడదు చెట్టు
    గుండె కోతలెన్నైనా మండి పడదు చెట్టు
    మమతల జాబిల్లి మూగతల్లి చెట్టు
    పెంచిన ప్రేమపాశమే గంటుపడిందేమో
    నేలకొరిగిన పుడమిబిడ్డ ఆ చెట్టు
    ప్రాంగణం చిన్నబోయింది లేక చెట్టు
    ప్రకృతి పరితపించి కలవరపడె
    మౌనమూర్తియై కాలం కదలసాగె
    తన పట్టులన్నీ సడలి కూలె చెట్టు
    మనిషి మనుగడను మోడు చేసె చెట్టు..

    ReplyDelete
  6. పూలకొమ్మలతో చెట్ట్లూగుతూ చల్లగానిస్తూ
    గిజిగాడి గూళ్ళు కట్టుకుని కోయిల పాటలు పాడుతూ
    నిలువనీడలేని నిర్భాగ్య పసివారిని ఊయలలూగిస్తూ
    మనిషిపోయినా తరం మారినా నిరంతరం నిలబడేవి చెట్లు
    కాని రానురాను నిర్దాక్షిణ్యంగా వృక్షాలను నరికివేస్తుంటే
    నిస్సహాయంగా చూస్తూ ఊరుకోవడం మూర్ఖత్వం
    వాటిని రక్షించి మనల్ని మనం కాపడుకోవడం మానవధర్మం
    మీ కవితలో చెట్లు కూలటంలోని ఆవేదన బాగావ్రాసారు.

    ReplyDelete
  7. Trees do so much for you and me, saving them is the key, so a better future we can all see.
    Good awareness poem.

    ReplyDelete
  8. చెట్లు లేకపోతే పీల్చే ప్రాణవాయువుకు లోటు
    చెట్లు నరికితే వాతావరణానికి కలుగుతుంది చేటు

    ReplyDelete
  9. చెట్లను నాటి ప్రాణకోట్లను రక్షించమని చెట్టు రోధిస్తున్నట్లు బాగారాశారు.

    ReplyDelete
  10. మానవా.....మనసు ఉన్న మనిషివి కదరా నీవు ఇకనైనా మారవా
    manushulu marali.....

    ReplyDelete
  11. వృక్షో రక్షిత రక్షితః

    ReplyDelete
  12. చెట్లు పలకరించవు కాని చల్లగాలిని పంచుతాయి
    ఎండలో నీడను ప్రసాదించి ఎండి రాలిపోతుంటాయి
    మాట్లాడకుండా మనసులో మదన పడుతుంటాయి
    తమ ఉనికి కరువైతే మనకు కీడు అని చెబుతాయి

    ReplyDelete
  13. ఒక్క చెట్టును నాటితే వందసార్లు కాశీయాత్ర చేసినంత పుణ్యమని ఓ నమ్మకం. పాపపుణ్యాల ప్రస్తావన పక్కన పెడితే, మొక్కను నాటితే ప్రకృతికి మంచి జరుగుతుంది. గువ్వలూ కాకులూ గూళ్లు కట్టుకుంటాయి. చీమలూ దోమలూ పురుగూపుట్రా... చుట్టుపక్కల చేరిపోతాయి. మొత్తంగా, చెట్టును నమ్ముకుని బతికే జీవాల సంఖ్య ఐదొందల దాకా ఉంటుంది. అంటే, ఒక్క చెట్టును నాటితే ఐదొందల జీవాల్ని పోషించినట్టే. ఇవన్నీ పర్యావరణ పరిరక్షణలో వీర సైనికులే. చెట్టుమీది పక్షులన్నీ పొలాల్లోని చీడపీడల్ని తిని, రైతుకు అండగా నిలుస్తాయి. చెట్టును నమ్మినవాడు ఎన్నడూ చెడిపోడు! కన్న బిడ్డలు మోసం చేస్తే చేయొచ్చు కానీ పెంచిన చెట్లు నష్టం కలిగించవు. మంచి ఉపయోగకరమైన కవిత-హరినాథ్.

    ReplyDelete
  14. ప్రకృతికి ఆధారమైన చెట్లను సంరక్షిస్తూ ప్రకృతికి ప్రాణం నరికివేతకు గురవుతున్న వృక్షాలకు పునర్జన్మను ఇద్దాం రండి.

    ReplyDelete
  15. చెట్లను కాపాడమని బాగారాసారు మాడం.

    ReplyDelete
  16. పాడుగాలిని కడుపులో నింపుకుని ప్రాణవాయువు మీకు ఇస్తున్నాను
    100% correct

    ReplyDelete
  17. అందరి స్పూర్తి వాక్యాలకు..పద్మాంజలి _/\_

    ReplyDelete
  18. చెట్ల విలాపం వివరణ బాగుంది.

    ReplyDelete
  19. వృక్ష ఆవేదన మనసుని తాకింది.

    ReplyDelete
  20. చెట్టు గోడు కదిలించి మనిషి వాటిని కత్తిరించరాదని ప్రార్ధన.

    ReplyDelete
  21. వృక్ష సంపదను కాపాడమని పెట్టిన పోస్ట్ చాలా బాగుంది.

    ReplyDelete
  22. సూపర్ రాసారు మాడం.

    ReplyDelete