కలువ(పద్మ) వ్రాసిన కవిత...

క గుణింతముతో కలువ(పద్మ) వ్రాసిందొక కవితను..

కాస్తంత మీ సమయాన్ని వెచ్చించి చదవమంటాను..

కించిత్ దయ ఎదుటివారిపై చూపమంటాను..

కీర్తి ప్రతిష్ఠలకై ప్రాకులాడడం ఏలంటాను..

కుబేరుడేల కుచేలుడిలా ఉండమంటాను..

కూడబెట్టినవి ఏవీ మనవెంట రావని అంటాను..

కృత్రిమమైన ప్రేమాభిమానాలు వలదంటాను..

కౄరత్వాన్ని మించిన పాపమేదీ లేదంటాను..

కెంపులు, కాసులు మనకెందుకని అంటాను..

కేటుగాళ్ళతో సహవాసమే మనకి వద్దని అంటాను..

కైలాసగిరికి మార్గము మంచితనమేనంటాను..

కొద్దో గొప్పో మంచిపేరుంటే అదే చాలనుకుంటాను..

కోటి విద్యల కూడులో కొంతైనా పరులకి పెట్టాలంటాను..

కౌసల్య సుప్రజా రామలకి కొంత సమయం కేటాయించమంటాను..

కంటికి కునుకు పడ్డాక పరుపైనా కటికనేలైనా ఒకటేనంటాను..

కః తో ఏదైనా ఒక మంచి మాటని సెలవీయండని అంటాను.!!!!