పువ్వుని పలుకరిస్తే!!

పువ్వుని పలుకరిస్తే!! వాటికే చూపొస్తే!!
చామంతికి చేరువైతే చైతన్యాన్ని ఇస్తానంటుంది.
కలువని కలవరపెడితే కంటిపై కునుకు కరువౌతుంది.
గడ్డిపువ్వు గ్రహణం పట్టిన వేళ గరగనై గతించిపోతానంది.
బంతితో బంధాన్ని పెంచుకుంటే భారమై నిన్ను బాధిస్తుంది.
గన్నేరు గళమందు చేరితే తనువంతా గజగజ లాడుతుంది.
తంగేడుకి తళుకులు తక్కువని తనలో తానే మదనపడుతుంది.
గులాబిని గుబులుపుట్టిస్తే గునపమై గుండెలో గుచ్చుకుంటుంది.
మొగలిపువ్వా మోహించమంటే మాలగా నేను పనికి రానంది.
సంపంగితో సరసాలాడితే వాసనేగాని సావాసానికి తగనంటుంది.
నందివర్థనాన్ని నేచేరుకుందామంటే నటరాజుకే తానంకితమంది.
కనకాంబరాలపై కరుణ చూపితే కటాక్షించి కనువిందు చేస్తానంది.
మందారాన్ని మరులుగొలిపితే మమతలమాలై నన్నల్లుకుంటానంది.
పారిజాతాన్ని పరిణయమాడదామంటే పవళింపు వేళ నేపనికిరానంది.
మల్లె సువాసనల మత్తులో మంచిని మరువకని మెల్లగా మందలించింది.
ఉమ్మెత్తా నీవు ఊసులాడవేమంటే ఊహలలోకూడా నా ఊసెక్కడుందంది.
కుంకుమపువ్వా నీకు కులుకులేలనంటే, కాసులతోనే తన కాపురమంది.
పొద్దుతిరుగుడుతో పొందుకోరితే సూర్యుడు పొంచి చూస్తున్నాడంటుంది.
మరువం మమకారమే లేదు మీకు నాపై నేను పువ్వునేకాదు పొమ్మంది.