నిజమయ్యే కల!

ఎందుకో మౌనమంటే భయం వేస్తుంది
మనసువిప్పి మీకో నిజం చెప్పాలనుంది
నాకు కలలు కనడమంటే ఎందుకో భీతి
నేడు కలిగె సత్యమంటే అమితమైన ప్రీతి!

కనులుగన్న కలలెన్నడూ నిజం కాలేదు
కల నిజమన్న భ్రమలో సత్యం దరిచేరలేదు
కలలు నేర్పిన పిరికితనం నిజానికి ముసుగేసింది
తెలివిలేనితనం సత్యాన్ని వీడి స్వప్నాల్లో తేలింది!

నేడు అనుకోని నిజాలు ఆకస్మికంగా వచ్చి వాలాయి
కలలో తేలి ఆడుతున్న నన్ను తట్టి నిదుర లేపాయి
సత్యానిది తప్పులేదు, అది హెచ్చరించి ఎదురునిలచింది
వెన్నుతట్టి ప్రోత్సాహాన్ని ఇచ్చి ముందుకి నడిపించింది!

కలలను మరచి నిజాన్ని నిర్భయంగా కౌగలించుకోవాలి
సత్యబాటలో నడుస్తూ ధైర్యంతో కొత్తదిశలో పయనించాలి
చెడు అగ్నికి ఆహుతైతే సత్యం మౌనంవీడి చిందులేసింది
జ్ఞానాన్ని సత్యంతో చేతులు కలిపి నవ్వుతూ సాగమంది...