నిట్టూర్పు సెగ

ఎప్పటికీ ముగియని మన సంభాషణల్లో...

నాకు నేను నవ్వుతూ నిన్ను నవ్విస్తాను!

నువ్వంటావు నిన్ను పడదోసే మాటలివని

చూపనా! మౌనంగా నీవు చేసిన పంటిగాట్లని.

ఎప్పుడోసారి తీరిగ్గా ముచ్చటిస్తావు కలల్లో...

నన్ను నేను చూసుకుంటూ నువ్వే అనుకుంటాను!

నువ్వంటావు రేయంతా కంటిపై కునుకై రాలేదేమని

చూపనా! కాయలే కాసిన కంటిలో నీ ప్రతిబింబాన్ని.

ఎడబాటు ఎన్నాళ్ళో ఈ ఎదురుచూపుల్లో...

నన్ను నేనే సముదాయించుకుని నిరీక్షిస్తాను!

నువ్వంటావు విరహంతో తాళలేక తపిస్తున్నావని

చూపనా! తమకంతో తడిచీరలో దాగిన తనువుని.

ఎదపై ఒదిగి ఒకటైపోవాలి ఊహల వాకిల్లో...

నేను నా కల నిజమయ్యేను అనుకుంటాను!

నువ్వంటావు సర్వం మరిపించు సాంగత్యంలోనని

చూపనా! నన్ను నేనే మరచి నీవైన యుగక్షణాలని.